VVS taratqan málimetke súıensek, 7 qańtarda bastalǵan Los-Andjelestegi órtten 180 myńǵa jýyq adam evakýasııalanǵan, shamamen 10 myń ǵımarat qyzyl jalynǵa oranǵan. Los-Andjeles okrýginiń patologoanatom dárigeri 24 adam órttiń qurbany bolǵanyn málimdedi. 16 adam Iton aýdanynda, taǵy 8-i Palıseıds aýdanynda tabylǵan. О́rt 3 aýdanda – Pasıfık-Palıseıds (shamamen 96 sharshy shaqyrymdy qamtıdy), Iton (shamamen 57 sharshy km) jáne Herst aýdanynda (shamamen 3,2 sharshy km, baqylaýǵa alyndy) oryn alǵan. Juma kúni Los-Andjelestegi qatty jel azdap basylyp, órt sóndirýshiler birshama jerdi aýyzdyqtaǵan. Alaıda jel qaıta kúsheıgen. Sınoptıkterdiń boljamynsha, jeksenbi kúni bastalǵan «Santa-Ana» jeli sársenbige deıin jalǵasyp, jyldamdyǵy saǵatyna 96 km-ge jetýi múmkin. Sondaı-aq AQSh aýa raıy qyzmetiniń málimeti boıynsha, eń qatty jel seısenbide, ıaǵnı búgin bolady dep kútilip otyr. Pasadena órt sóndirý bóliminiń bastyǵy Ched Ogastın: «О́kinishtisi, jeksenbiden bastap sársenbige deıin «Qyzyl Jalaý» rejimine oralamyz. Jel ekpini seısenbide kúsheıgeli tur. Biz biraz jerde órtti sóndirdik, alaıda kúres áli bitken joq», dedi VVS-ge bergen málimdemesinde. Al Kalıfornııa órt sóndirý bóliminiń ókili Todd Hopkıns jeksenbide Palıseıdstegi órt shamamen 90 sharshy shaqyrym aýmaqty joıyp, Brentvýd aýdanyna taralý qaýpi bar dep málimdedi. Onda kóptegen Gollıvýd juldyzdarynyń, sonyń ishinde Arnold Shvarseneggerdiń jáne Rız Ýızerspýnnyń úıleri ornalasqan. Sonymen qatar Brentvýdta Gettı kórme ortalyǵy ornalasqan, onda baǵa jetpes óner týyndylary, sonyń ishinde Rembrandt pen Van Gogtyń sýretteri bar. О́rt shamamen 1,8 mıllıon adam turatyn San-Fernando alqabyna da taralýy múmkin.
Los-Andjeles sherıfi Robert Lýna jeksenbide qalanyń 105 myń turǵynyna evakýasııalaýǵa nusqaý berilgenin, taǵy 87 myńǵa evakýasııalaý týraly buıryq berilgenin habarlady. Aıta keteıik, AQSh-tyń Kalıfornııa shtatynda 73 otandasymyz bilim alyp jatyr, onyń ishinde «Bolashaq» baǵdarlamasymen 56 stýdent jáne «ǵylymı taǵylymdama» baǵdarlamasymen 17 adam oqıdy. Olardyń barlyǵy qaýipsiz jáne kýratorlarmen baılanysta. «Halyqaralyq baǵdarlamalar ortalyǵy» AQ jaǵdaıdy muqııat qadaǵalap otyrǵanyn habarlady. «Stıpendıattar jergilikti bıliktiń nusqaýlaryn oryndap, bizge jaǵdaı týraly jedel habarlaıdy. Biz ýnıversıtettermen turaqty baılanysta otyrmyz jáne kez kelgen jaǵdaıda jaýap berýge daıynbyz», dep málimdedi «Halyqaralyq baǵdarlamalar ortalyǵy» qyzmetkerleri.
Sondaı-aq Kalıfornııada 2,5 jyldan beri turyp jatqan otandasymyz Jasulan Serik «Los-Andjeles qalasynyń ózinde órt bolǵan joq. Tek shetki aımaqtaryndaǵy orman men taýǵa jaqyn qalalarynda oryn aldy», dep jazdy Facebook paraqshasynda. Onyń málimetinshe, jalpy Los-Andjeles okrýginde 10 mıllıon halyq turady.
«Jelide jasandy ıntellekttiń jalǵan vıdeolary kóptep júr. Sonyń birin aıta keteıin: Gollıvýd jazýy janynda órt bolǵan joq. О́rt sebepteri: adamdardyń tabıǵatta baıqamaı órtep alýy, ádeıi órteýge áreket jasaǵan adamdar da ustalǵan, Santa-Ana jeliniń sáıkes kelýi (bizshe Besqonaq jeli), kúnniń ystyq (qurǵaq) bolýy, órt sóndirý ınfraqurylymy bıýdjetiniń azaıýy. О́rt basqarýǵa kelgendeı, biraq órt sóndirýshiler áli tolyq toqtata almady. Qýanyshtysy, órtti eldi mekenderden alystatty», dep túsindirdi ol.
Al Syrtqy ister mınıstrliginiń resmı ókili Aıbek Smadııarov: «Ol jaqtaǵy Qazaqstan azamattary bizge kómek surap habarlasqan joq. Jalpy, sol jergilikti halyq evakýasııa jasaǵanda barlyǵy birge kóshiriledi», dep pikir bildirdi.
