AQTО́BE. 1 mamyr. Aqtóbe qalasynda Qazaqstan halqynyń birligi kúni aıryqsha atalyp ótildi. Bul týraly egemen.kz tilshisi habarlady.
Ábilqaıyr han eskertkishi aldyndaǵy alańǵa kún kóterilmeı-aq qaraqurym halyq jınalyp qalypty. Bular – merekege oraı uıymdastyrylǵan «Seniń marafonyń – seniń jeńisiń» atty marafonǵa qatysýshylar. Qalanyń kásiporyndary men uıymdarynan jáne joǵary oqý oryndary men kolledjderden, mektepterden barlyǵy 4,5 myń adam qatysqan marafonda erler 21, áıelder 10, al, buqaralyq marafonshylar 3 shaqyrymǵa júgirip ótip, Qazaqstan Respýblıkasynyń Tuńǵysh Prezıdenti Nursultan Nazarbaev atyndaǵy ortalyq saıabaqqa jınaldy.
Munda da mereke áldeqashan bastalyp ketken. Túrlenip, túlep ketken saıabaq ortasyndaǵy úlken sahnadan san ulttyń áýezdi úni asqaqtaıdy. Merekelik sharanyń saltanatty ashylýynda oblys ákiminiń orynbasary Sara Nurqatova quttyqtaý sóz sóılep, elimizdegi ultaralyq dostyq pen birliktiń tereńnen tamyr tartatynyn, oǵan Elbasy ustanǵan sarabdal saıasattyń berik irgetas qalap otyrǵanyn jetkizdi. Sodan keıin elimizdegi tatýlyq pen turaqtylyqqa eleýli úles qosyp júrgen etnomádenı birlestikter tóraǵalary men múshelerine «Qazaqstan halqy assambleıasynyń 20 jyldyǵy» merekelik medalin tapsyrdy.
Shara barysynda marafon jeńimpazdary da marapattalyp, olarǵa aqshalaı jáne eskertkish syılyqtar tapsyryldy. Sońynda jınalǵandarǵa «Dostyq» oblystyq jáne «Qazaqstan – dostyqtyń mekeni» atty aımaqtyq festıval laýreattarynyń gala-konserti usynyldy.
Satybaldy Sáýirbaı.
Derek, sýret: egemen.kz.
