Sýretterdi túsirgen – Jumabaı Musabekov
Máselen, óńir kóleminde kúndelikti qoǵamdyq tártipti jáne jol qaýipsizdigin qamtamasyz etýge 1 myńnan asa qyzmetker men 110 kólik quraly tartylady. Al 140 polısııa ókili men Ulttyq ulannyń 136 sarbazy taldyqorǵandyqtardyń tynyshtyǵyn kúzetedi. Eń qıyny meıramdarda jol qaýipsizdigin saqtaýǵa 2 myńnan asa qyzmetker jáne 200 jýyq qyzmettik kólik quraly jumys isteıdi. Sol sebepti oblys ákimi Beıbit Isabaev jaýapkershiligi mol salanyń mańyzdylyǵyn túsindire otyryp, saltanatty is-sharada tártip saqshylaryna arnaıy avtokólikterdiń kiltin tabystady.
«О́ńirdiń turaqty damýy eń aldymen qoǵamdyq tártiptiń saqtalýyna, turǵyndardyń qaýipsizdigi men eldiń tynyshtyǵyn qamtamasyz etýge tikeleı baılanysty. Qazirgi jańa reformalarǵa negiz bolyp otyrǵan zańnyń ústemdigin ornyqtyrý, ádildik pen ashyqtyqqa jol ashý mindetterin iske asyrýda sizderge artylar jaýapkershilik júgi úlken. Sondyqtan sizderdiń ýaqytpen sanaspaı, kún-tún demeı, kúrdeli de jaýapty jumysty adal atqarǵan eńbekterińizdi árdaıym baǵalaımyz jáne alǵys aıtamyz. Osy oraıda alańsyz jumys isteýlerińizge qolaıly jaǵdaı jasaý – Memleket basshysynyń aldymyzǵa qoıǵan basty mindetteriniń biri. Bul rette búgingi ıgi is-shara sizderdiń óz mindetterińizdi laıyqty atqarýǵa, jumystaryńyzdyń sapasy men tıimdiligin jaqsartýǵa múmkindik beredi dep senemin», dedi B.Isabaev.
Jıyn barysynda jalpy sany 40 avtokólik, ıaǵnı oblystyq polısııa departamentiniń árbir aýdandyq, qalalyq polısııa bólimshelerine 4 qyzmettik avtokólikten berildi. Atap aıtqanda, ýchaskelik polısııa ınspektorlaryna, patrýldik polısııaǵa «Chevrolet Cobalt», tabıǵatty qorǵaý bólimshelerine «Wingle 7», kezekshi bólimderge «GAZ Sobol» markaly avtokólikteri, sol sııaqty Panfılov aýdandyq bólimine 4 avtokólikke qosymsha taǵy bir kólik – «JAC Sunray» tabystaldy.
О́z kezeginde oblystyq polısııa departamentiniń bastyǵy, polısııa polkovnıgi Sarqytbaı Qusaınov sóz alyp, ishki ister organdaryna jasalyp otyrǵan qoldaýlar úshin alǵysyn bildirdi:
«Kúndelikti kóshede jáne basqa da qoǵamdyq oryndarda tıisti tártiptiń saqtalýyn baqylaý, azamattardyń qaýipsizdigin qamtamasyz etý – bizdiń basty mindetimiz. Osy oraıda bizdiń bólimshelerdi materıaldyq jáne tehnıkalyq jabdyqtaýǵa úlken qoldaý kórsetip otyrǵandaryńyzǵa alǵys aıtamyz», dedi ol.
Jalpy, oblysta ishki ister organdarynyń materıaldyq-tehnıkalyq bazasyn nyǵaıtýǵa erekshe kóńil bólinedi. Máselen, 2022 jyly jergilikti bıýdjetten 26 avtokólik satyp alynyp berilgen edi. Oǵan qosa búginge deıin oblysta 34 bekette, sonyń ishinde «Almaty – О́skemen» avtojolyna jáne Taldyqorǵan qalasynyń joldaryna jalpy sany 240-qa jýyq «Sergek», «Vidar», «Zerek» beınekameralary ornatyldy. Túrli úlgidegi 8 mobıldi keshen satyp alynyp, ishki ister organdarynyń qyzmettik avtokólikterine ornatyldy. Olardyń zań buzýshylyqtardy anyqtaýda edáýir yqpaly bar ekenine tájirıbe júzinde kóz jetkizilgendikten, aldaǵy jyly osyndaı taǵy 20 mobıldi keshen satyp alýǵa 445 mln teńge qarjy qarastyrylyp otyr.
«Bizdiń áriptester demalys kúnderi de tynym tappaıdy. Polısııa keshendi kúshteri jasaqtarynyń qyzmet ótkerýine baqylaý kúsheıtildi. Qaýipti aımaqtardyń radıýsyn, jer bederin, aýa raıy jaǵdaılaryn, irgeles obektilerdiń sıpatyn jáne olardy paıdalaný qaýipsizdigine áser etetin basqa da faktorlardy eskere otyryp, merekelik otshashýdy ushyrý oryndaryn kúzetý qarastyryldy. Kóliktiń, arnaıy tehnıkanyń, qarý-jaraqtyń, jeke qorǵanys jáne belsendi qorǵanys quraldardyń qoǵamdyq tártipti saqtaý boıynsha mindetterdi oryndaýǵa, jedel ahýal shıelenisken jaǵdaıda kúshter men quraldardyń tasymaldanýǵa daıyndyǵy tekserildi», deıdi azamattyq qorǵaý maıory Qaldybek Tóleýuly.
Aıta keteıik, mereke kúnderi oblys kóleminde barlyǵy 2 682 ákimshilik buzýshylyqtar anyqtalǵan.
Jetisý oblysy
