Sýretti túsirgen – Jumabaı MUSABEK
Oblys ákimi Beıbit Isabaevtyń tapsyrmasyna sáıkes ótken jyly «Bereke» kottedj qalashyǵyndaǵy qurylys sapasyna baılanysty ózekti máselelerdi sheshý baǵytynda birqatar jumys júrgizildi. Sonyń nátıjesinde jurt tilegi oryndaldy.
«Bereke qalashyǵy oblys ákiminiń jeke baqylaýynda tur. Aı saıyn arnaıy tekserý jumystary júrgiziledi. Burynǵy qatelikterge qaıta jol berýge bolmaıdy. Kezekte turǵan kópbalaly analar tıesili úıine kirip jatyr. Bári zańnyń aıasynda, qurylys jumystaryn bilikti mamandar qadaǵalap otyr. Jyl sońyna deıin jóndeý jumystary tolyqtaı aıaqtalyp, qalashyqtyń tynysy keńeıedi», dedi Taldyqorǵan qalasynyń ákimi Ernat Bázil.
Qalashyqta qurylysy aıaqtalmaǵan, sapasynda kemshilikteri barlaryn qosa alǵanda problemalyq 204 kottedj bolǵan. Eskertýler túzetilgennen keıin 25 kottedj ótken jyldyń sońynda kezekte turǵan azamattarǵa berildi. Endi mine, 30 otbasyǵa úı kiltteri tabystaldy. Taǵy 42-sin birinshi toqsannyń sońyna deıin paıdalanýǵa berý josparlanǵan. Qalǵan 107-si kezeń-kezeńimen engiziledi.
О́ńir ákiminiń baspasóz qyzmetiniń málimetinshe, jalpy oblys kóleminde halyqty qoljetimdi baspanamen qamtamasyz etýdiń barlyq sharalary qabyldanyp jatyr. О́tken jyly óńirde turǵyn úı salý jáne satyp alý esebinen 2 708 otbasy jańa qonysqa ıe boldy. Oblys ortalyǵyna kelsek, byltyr kezekte turǵandar qatarynan 1 283 otbasy turǵyn úımen qamtamasyz etilse, bıyl taǵy 1 400-den astam otbasyn qamtý josparlanyp otyr.
«Turǵyn úı kezeginde 10 jyldan asa turdym. Osy sátti uzaq kúttik. Otbasymyzdy qýanyshqa keneltken azamattardyń bárine shyn júrekten alǵys aıtamyn. Buryn kózge qorash kórinetin úılerge tirshilik qaıta oralyp, ózim qatarly kelinshekter máz-meıram bolyp júr», deıdi jeti balanyń anasy Gúlnur Nurymbetova.
Panfılov aýdanynyń Jarkent qalasynda da 80 páterli turǵyn úı paıdalanýǵa berildi. Jańa páterlerdi áleýmettik osal top sanatymen kezekte turǵandar, jetim balalar, kópbalaly otbasylar, basqa da sanattaǵy azamattar aldy, sóıtip, kezekte turǵan 700-ge jýyq adam baspanaly boldy.
Oblystyq qurylys basqarmasynyń málimetinshe, bıyl óńirde 100 densaýlyq saqtaý nysany, 10 mádenıet nysany, 8 bilim berý nysany, 3 sport nysany, 1 ońaltý ortalyǵy salynady, solardyń 105-i bıyl iske qosylady dep josparlanǵan.
«Bıyl Alakól jáne Panfılov aýdandarynda 900 oryndy 2 jańa mektepti paıdalanýǵa berý josparlanyp otyr. Alakól aýdany Lepsi aýylynda jańa deneshynyqtyrý-saýyqtyrý kesheni boı kóteredi. Sondaı-aq jańa mádenıet úıleri Aqsý aýdanynyń Mataı, Arasan, Esbolatov aýyldarynda, Kóksý aýdanynyń Jarlyózek aýylynda iske qosylady. Olardyń ekeýi sport zaldarymen biriktirilgen nysandar bolmaq. Densaýlyq saqtaý salasynda 39 feldsherlik-akýsherlik, 20 medısınalyq pýnkt, sondaı-aq 4 jedel járdem stansasy, QAJK-niń 1 medısınalyq qyzmeti nysany salynady», delingen oblystyq qurylys basqarmasynyń habarlamasynda.
Bıyl áleýmettik nysandar, turǵyn úıler, ınjenerlik-kommýnıkasııalyq jeliler, órt sóndirý deposy, aýyl sharýashylyǵy obektileri, jalpy alǵanda túrli saladaǵy 298 nysannyń qurylysy josparlanǵan. Oblys qurylǵaly beri jóndeý men jańa qurylys júrgizýdiń nátıjesinde nysandardy jańartý 50%-ǵa jetti. Sonyń ishinde ótken jyly óńirde 171 nysan salynyp, paıdalanýǵa berildi.
Jetisý oblysy
