Sábıdiń jetilýine múmkindik beretin medısınalyq jabdyqtar Mańǵystaý oblystyq ákimdiginiń jáne «DUNGA OPERATING GMBH» kompanııasynyń qoldaýymen alyndy. Qurylǵyny tabystaý rásimine aımaq basshysynyń orynbasary A.О́risbaev, Mańǵystaý oblystyq densaýlyq saqtaý basqarmasynyń basshysy B.Izbasarov, demeýshi kompanııanyń bas dırektory N.Ábdirahmanov, kópbeıindi aýrýhananyń dırektory R.Bekibaev qatysty.
Perınataldyq ortalyqtyń jansaqtaý bóliminiń meńgerýshisi, neonatolog-dáriger Ý.Rashıdovtiń aıtýynsha, gıpotermııa apparaty aýyr asfıksııamen týǵan sábıdiń ómirin qutqaryp, bas-mı isiginiń aldyn alýǵa qajet. Apparat jańa týǵan náresteniń dene qyzýyn avtomatty túrde 34 gradýsqa deıin tómendetedi, 72 saǵat boıy ony qajetti deńgeıde ustaıdy, sodan keıin balany birtindep jylytady. Bala aǵzasyndaǵy metabolızmdi ózgertýge, mıdy glıýkozamen qamtamasyz ete otyryp, ortalyq júıke júıesiniń jasýshalaryn qaıtymsyz zaqymdanýlardan qorǵaýǵa múmkindik beredi.
Sondaı-aq shala týǵan nárestege arnap satyp alynǵan 8 ınkýbatorda náresteler salmaq qosqanǵa deıin jatady. Quraldardyń ylǵaldylyǵy, temperatýrasy saqtalyp, avtomatty túrde balaǵa qajetti jaǵdaı jasaıdy, qosymsha fotolampasy men monıtory bar.
О́kpeni jasandy jeldetý zamanaýı apparaty da aýrýhana ıgiligine berildi. Qurylǵy úsh rejimde kómek kórsetýge qaýqarly. Ýmıd Rashıdovtiń aıtýynsha, alǵashqy rejim CPAP – shala týǵan balalarǵa demalýǵa kómektesse, SIMV balanyń ornyna tynys alady. Al joǵary jıiliktegi jasandy jeldetý ókpesi damymaǵan, ókpesinde aqaýy bar nárestelerdiń jaǵdaıyn jaqsartýǵa qoldanylady.
Perınataldyq ortalyqta 6 balaǵa arnalǵan jansaqtaý bólimi byltyr aqpan aıynda ashylǵan bolatyn. Qazirde jansaqtaý bóliminde 8 náreste em alyp, onyń ekeýi ottegi qabyldap jatyr. 1 náreste CPAP apparatyna, 1 náreste О́JJ qurylǵysyna qosylǵan. Qalǵan balalar aýyr jaǵdaıdan shyǵyp, ózdigimen demalyp, emdelip jatyr.
Mańǵystaý oblysy
