London sahnasynda qazaq tilinde spektakl qoıyldy

ASTANA. 1 mamyr. Qazaqstan tarıhynda alǵash ret Ulybrıtanııada qazaq tilinde spektakl qoıyldy. London qalasynda ótip jatqan qazaq mádenıeti festıvali aıasynda Nartaı Bekejanov atyndaǵy Qyzylorda mýzykalyq-drama teatry belgili jazýshy jáne dramatýrg Dýlat Isabekovtiń «Eski úıdegi kezdesý» pesasyn sahnalady. Bul týraly 24.kz habarlady. Spektakl Orta Azııa halyqtarynyń ónerin baǵalaýshy jergilikti halyqtyń asa qyzyǵýshylyǵyn týdyrdy. Osydan eki jyl buryn atalǵan pesany «Orzý» brıtanııalyq Ortalyq-Azııa teatry jergilikti kórermenderge aǵylshyn tilinde usynǵan bolatyn. Al bul joly negizinen qazaq tilinde oınaldy. Basty dıalogtardyń qazaqsha bolǵanyna qaramastan, kórermender sahnadaǵy jaǵdaıdy arnaıy sýbtıtr arqyly túsinip otyrdy. London ýnıversıtetiniń stýdenti Djordj Ýer qazaq spektakli jóninde: «Nege ekenin bilmeımin, bastapqyda qoıylym tragedııa janry boıynsha bolatyn shyǵar dep oıladym. Degenmen, alǵashqy kórinisten-aq bul kóptegen synaqtan ótip, bir-birine qosylǵan eki jannyń mahabbaty týraly ekenin bildim. Jalpy, maǵan óte qatty unady», – dep óz pikirin bildirdi. Taǵy bir kórermen, memlekettik saıasat boıynsha sarapshy Inderjıt Sıh Nıjhar: «Avtor óz keıipkerleriniń minez-qulqyn tamasha asha bilgen. Maǵan bul romantıkalyq qoıylym erekshe unady. Men Isabekovtiń shyǵarmashylyǵyn aıryqsha qurmetteıtin jandardyń birimin. Keıbir kitapty oqyp otyryp, ondaǵy jaıtty júregińmen qabyldaıtyn kezder bolady. Dýlat Isabekovtiń shyǵarmalary dál sondaı», – dep qazaq spektakline joǵary baǵasyn berdi. Elaman Qońyr. Derek, sýret: 24.kz.