Sýret: primeminister.kz
Byltyr jalpy quny 1,9 trln teńgeni quraıtyn 86 ınvestısııalyq jobany iske asyrý jónindegi bes jyldyq baǵdarlama sheńberinde óńirde 411 jańa jumys orny ashylǵan. Jalpy, 37 mlrd teńgege 21 joba iske asyrylǵan. Onyń ishinde 6 joba qurylys materıaldaryn óndirý boıynsha, 10 joba agroónerkásiptik salada, 1 joba kólik logıstıkasy salasynda, qalǵandary saýda jáne bilim berý salasyna qatysty. Iri jobalardyń qatarynda Qorqyt ata áýejaıynyń jańa termınaly da bar.
2025 jyly Qyzylorda oblysynda myńǵa jýyq jumys ornyn quryp, 30,8 mlrd teńge ónim shyǵarýǵa múmkindik beretin 275,3 mlrd teńgeni quraıtyn 24 jobany iske qosý josparlanyp otyr. Iri zaýyttardyń qatarynda jylyna 90 mln dana kirpish shyǵaratyn, túıe sútinen jylyna 392 tonna untaq óndiretin, jolaýshylar vagondaryn jóndeıtin jobalar bar. Qýaty 240 MVt bolatyn jańa JEO qurylysy da – osy qatarda.
«Aldaǵy ýaqytta jalpy qýaty 141 MVt bolatyn 4 kún jáne 1 jel elektr stansasynyń qurylysyn júzege asyrýdy josparlap otyrmyz. Oblystyń elektr energııasyna degen suranysy táýligine 200 MVt-ty quraıdy, óńirde jalpy qýaty 89 MVt bolatyn 9 kún elektr stansasy jumys isteıdi. 5 joba iske qosylǵanda óńirimiz tolyǵymen jasyl energetıkaǵa kóshedi», dep atap ótti oblys ákiminiń orynbasary Ardaq Zebeshev.
Syrtqy ister mınıstrligi Investısııalar komıteti qatysýshylarǵa Ulttyq sıfrlyq ınvestısııalyq platformany ıaǵnı ınvestorlardyń, memlekettik organdardyń jáne kvazımemlekettik sektordyń ózara is-qımyly úshin biryńǵaı tereze múmkindikterin tanystyrdy. Búginde platforma pýlynda 836 joba bar, onyń 246-syn osy jyly júzege asyrý josparlanǵan.
Keńeste oblystaǵy eki iri ınvestısııalyq jobany júzege asyrýǵa qatysty túıtkildi máseleler talqylandy. Bul – «Shalqııa» polımetall ken ornynyń tıimdiligin arttyrý jáne kalsıılendirilgen soda óndiretin zaýyt salý. Atap aıtqanda, taǵamdyq jáne ónerkásiptik as tuzyn, polıpropılendi qapshyqtar shyǵaratyn «Araltuz» AQ qazir elimizdegi kalsıılengen soda shyǵaratyn alǵashqy zaýyt qurylysynyń jobasyn qolǵa alǵan. Shyny bótelkelerdi óndirýge qajetti bul shıkizat komponenti elimizde tolyǵymen ımporttalady. Joba aıtarlyqtaı ınvestısııalardy qajet etedi, nesıelik qarjylandyrý merzimderi men sharttaryn uzartý boıynsha máseleler bar. Vıse-premer tıisti qarjy ınstıtýttaryna jobany qoldaý úshin barlyq múmkindikti qarastyrýdy tapsyrdy.
«Memlekettik organdar ınvestısııalyq jobalardy júzege asyrýdaǵy kedergilerdi joıýda bızneske barynsha kómek kórsetýi kerek. 2025 jylǵa arnalǵan 246 jobanyń maqsaty – jaqsy kórsetkish, oǵan jetý úshin múmkindiginshe barlyq kedergini joıyp, ýaqtyly qarjylandyrýdy qamtamasyz etý kerek. Ol úshin qysqa merzim ishinde Investısııalar komıteti О́nerkásip mınıstrligimen jáne ákimdiktermen birge basym sala ári joǵary qosylǵan qun qaǵıdaty boıynsha jobalardy gradasııalaýdy júrgizýi qajet. Sonymen qatar nátıjelerge súıene otyryp, olardy júzege asyrýǵa qoldaý bildirýi kerek», dep qorytyndylady jıyndy Serik Jumanǵarın.
