Sýretti túsirgen – Jumabaı MUSABEKOV
Jetisýdy tabıǵı áleýetine, ekonomıkalyq baǵytyna qarap, aýyl sharýashylyǵy salasyn ǵana damyta berýge bolmaıdy. Qazir óńirde ár salada kadr tapshylyǵy qatty bilinip tur. Syrttan bilikti maman tartqannan góri, oqýǵa qushtar jastardyń týǵan jerinde qyzmet etýine jol ashqan abzal. Osy maqsatta ári Memleket basshysynyń jumysshy mamandyqtar jyly jónindegi bastamasy aıasynda Jetisý oblysyndaǵy kolledjderde suranysqa ıe jańa mamandyqtardy ashý jumystary jalǵasyp jatyr.
Búginde óńirde «Jańa mamandyqtar atlasy» bekitildi. Ol, eńbek naryǵy men óńirdiń ekonomıkasyn damytý talaptary eskerile otyryp, 5 negizgi baǵytqa – aýyl sharýashylyǵy, óńdeý ónerkásibi, týrızm ındýstrııasy, aqparattyq-kommýnıkasııalyq tehnologııalar, energetıka jáne jańartylatyn energııa kózderi salalaryna baǵdarlanǵan. Máselen, ótken oqý jylynda óńirdiń 11 kolledjinde 13 jańa mamandyq ashylsa, bıyl taǵy 14 mamandyq ashylady.
«Jetisý oblysynda tehnıkalyq, kásiptik bilim berýdiń mazmunyn jańartý, sapasyn arttyrý, sondaı-aq jumysshy mamandyqtarynyń ımıdjin kóterý baǵytynda jumysshy mamandyqtary jylyn ótkizý jónindegi is-sharalardyń keshendi jospary bekitildi. Sondaı-aq «Jańa mamandyqtardyń óńirlik atlasy» ázirlendi. Oblys ekonomıkasynda basymdyq beriletin 5 salaǵa taldaý júrgizilip, jańadan paıda bolǵan, ózgergen, joıylyp bara jatqan, asa tapshy kásipter anyqtaldy. Ekonomıka salalarynyń basym baǵyttaryna bilikti mamandardy daıarlaý maqsatynda 2024–2025 oqý jylynda oblysta 240 bilim berý baǵdarlamasy ázirlendi», deıdi oblystyq bilim basqarmasynyń basshysy Marat Súleımenov.
Onyń aıtýynsha, gıdrotehnıkalyq melıorasııa, avtomattandyrylǵan óndiris júıelerine tehnıkalyq qyzmet kórsetý jáne jóndeý, mehatronık, haýs-sheber, tehnık-jobalaýshy (sáýlet), orman sharýashylyǵy, balyq sharýashylyǵy, jylyjaı sharýashylyǵyn uıymdastyrý syndy kásip ıeleri oblysqa aýadaı qajet. Máselen, ótken jyly materıaldyq-tehnıkalyq bazany nyǵaıtýǵa jergilikti bıýdjetten 475 mln teńgeden astam qarjy bólingen, bıyl taǵy 488 mln teńge bólinedi dep josparlanyp otyr. Jańa mamandyqtardy ashqan oqý oryndarynyń biri – Taldyqorǵan joǵary polıtehnıkalyq kolledji.
«Bizdiń kolledjde myń jarymnan astam stýdent 11 mamandyq boıynsha bilim alyp jatyr. Búginge deıin biz ashqan jańa mamandyqtardyń ishinde «Ushqyshsyz ushý apparattarynyń operatory», «BIM tehnıkter» bar. Bular «О́ńirlik jańa mamandyqtar atlasyna» engizilgen. Bıyl mehatronıka mamandyǵyn ashyp, elektronıka, robottehnıka, 3D basyp shyǵarýdy oqytamyz. Osyǵan baılanysty eki IT kompanııamen kelisimderimiz bar», deıdi Taldyqorǵan joǵary polıtehnıkalyq kolledjiniń dırektory Shyńǵys Nurǵojaev.
Budan bólek, oblystyq bilim basqarmasynyń derekteri boıynsha, óńirdiń kadrlyq qajettiligin qamtamasyz etý úshin 15 kolledjde 80 kásiporynnyń ótinimderine sáıkes 25 mamandyq boıynsha 809 adamdy nysanaly daıarlaý júzege asyrylady. Bul kásiporyndar kelisimshart negizinde oqýdy bitirgennen keıin stýdentterdi mindetti túrde jumysqa alady. Osy rette óńirde 15 kolledj dýaldy oqytýdy júzege asyryp keledi.
Aıta keteıik, óńir kóleminde jalpy sany 27 kolledj jumys isteıdi, sonyń 21-i memlekettik, 6-y jekemenshik. Olarda osy oqý jylynda 13 901 stýdent bilim alyp, onyń 10 155-i memlekettik áleýmettik tapsyrys sheńberinde, ıaǵnı tegin oqytylyp jatyr. Memlekettik tapsyrystyń kóp bóligi tehnıkalyq mamandyqtarǵa, ıaǵnı IT, qurylys, ınjenerııa, aýyl sharýashylyǵy, sý sharýashylyǵyna baǵyttalǵan. Jalpy, oqý oryndary aýyl sharýashylyǵy, qyzmet kórsetý salasy, qurylys, mashına jasaý, sondaı-aq tehnıkalyq, pedagogıkalyq, zań, ekonomıkalyq, medısınalyq baǵyttarda 70 mamandyq, 113 biliktilik boıynsha kadrlar daıarlaıdy.
Jetisý oblysy
