Mol jaýǵan appaq qardy kádege jaratý týraly oı jas ustazǵa qar kúrep júrgende kelgen. Qysqy kanıkýl kúnderi balalar asyr salyp oınaıtyn jer de kerek. Asylannyń asqan yjdaǵattylyqpen kirisken sharýasyna basynda úlkender tańdanyspen qarasa, balalar máz-meıram bolyp, kómekke keldi. Kóp jyldan beri aýdan halqy mundaı mol ári appaq bolyp jaýǵan qardy kórgen emes. Asylan birneshe kúnde ıreleńdegen denesiniń ortasynan qaqshıǵan basy, aıyr tili shyǵyp turǵan jylannyń beınesin ornatty. Muz bolyp qatqan músindi jasyl túske boıady. Sodan beri muz jylan balalar oıyn alańyndaǵy basty beınege aınaldy. Kanıkýl kúnderi osy jerde syrǵanaq teýip, asyr salady. Kompıýterge kógendelgendikten, úıden shyǵara almaıtyn ul-qyzdaryn ata-analary endi kún batqansha kirgize almaı álekke túsip júr. Úlkender kósheniń kórkin keltirgen jas ustazdyń eńbegine rıza bolyp batalaryn berdi. Bul kúnderi qala turǵyndary men qonaqtary jylan músini janynda sýretke túsip, tamashalaýdy ádetke aınaldyrdy.
Asylan 2009 jyly Q.Jubanov atyndaǵy Aqtóbe óńirlik ýnıversıtetin bitirgen. Shyǵarmashylyqty súıetin jas ustaz týǵan qalasyn kórkeıtýge yqylasty. О́tken Naýryz merekesi qarsańynda Oqýshylar saraıynyń aldyna ulttyq kıim kıgen qazaqtyń qyz-jigitiniń músinin ornatty. Taǵy bir kósheniń boıynda Asylannyń qolynan shyqqan sáýkele, qobyz, asyq músinderi tur. Sehanovıch atyndaǵy sport kesheniniń aldyndaǵy eki palýannyń beınesin jasap shyǵardy. Erekshe aq saz ben balshyq, gıpsti paıdalana otyryp, osyndaı týyndylardy dúnıege ákeletin oıly jastyń týǵan jerge degen súıispenshiligi maqtaýǵa turarlyq.
Aqtóbe oblysy
