Basty maqsat – jumysshy mártebesin kóterý

Jalpy, jospar 70 qadamnan turatyn 7 negizgi baǵytty qamtıdy. Onyń negizin­de 20 aımaqtyq bastama belgilen­di. Olar­dyń aıasynda jumysshy maman­dyq­tardy daıarlaý júıesin jetildirý, mektep oqý­shylaryna kásiptik baǵdar berý, jumys berýshilerdi ortaq iske qatystyrý sekildi áreketter qarastyrylǵan.

Oqý-aǵartý vıse-mınıstri Edil Ospan bıyl elimizde 12 iri respýblı­ka­lyq jáne halyqaralyq shara uıym­das­tyry­latynyn baıandady. Olardyń alǵashqysy aqpan aıynda elordada ótpek. «EXPO» kórme ortalyǵynda «Ju­mys­shy mamandyqtary qalasy» atty biregeı festıval josparlanǵan. 5 kún­dik is-sha­ra­da bolashaq mamandyqtar, ınnova­sııalyq tehnologııalardy kórsete otyryp, jumysshy mamandyqtardyń áleýetin pash etý kózdelgen. Festıvalde ekonomıkanyń naqty sektoryndaǵy suranysqa ıe baǵyttarǵa arnalǵan pavılondar jumys istemek. Oǵan barlyq óńirdegi iri kásiporyndar, salalyq odaqtar jumyldyrylady.

Sondaı-aq otyrysta «Samuryq-Qazyna» ulttyq ál-aýqat qorynyń Jumys­­shy mamandyqtary jyly aıasynda atqaratyn sharalary men aldaǵy jos­parlary qarastyryldy. Oǵan tıesili kompanııalar tobynda 255 myńnan asa adam qyzmet atqarady, olardyń 190 myńǵa jýyǵy – jumysshy maman­dyq ókilderi. Áli de 5 myń mama­nǵa suranys bar. Sondyqtan oqý oryn­dary­men dýaldy oqytý jónindegi kelisim­der, bos oryndar jármeńkeleri, jas maman­dardy damytý boıynsha baǵdarlama­lardy júzege asyrý kózdelip otyr.

«Samuryq-Qazyna» AQ 2032 jylǵa deıin 46 iri ınvestısııalyq jobany júzege asyrýdy josparlap otyr. Onyń aıasynda jalpy sany 64 myńnan asa jumys orny qurylady. Aksıonerlik qoǵam jumysshy mamandardy ázirleýge atsalysýǵa múddeli.

Salalyq mınıstrliktiń usynǵan sharalar tizbeginde Ortalyq Azııa elderi ókilderiniń qatysýymen IS3 halyqaralyq forýmy, respýblıkalyq Innovation hakatony, sondaı-aq alǵash ret Aqtaý qalasynda TURKICSKILLS kásiptik sheberlik chempıo­naty da bar.

Sonymen qatar komıssııa nazaryna iri kásiporyndardyń Jumysshy maman­dyqtary jyly aıasynda josparlaǵan is-sharalary da usynyldy. ERG, Allur Group kompanııalarynyń ókilderi sala­lyq oqý oryndarymen áriptestik qarym-qatynasy, jumysshylarǵa kórsetiletin áleý­mettik qoldaý sharalary, aldaǵy ýa­qyt­taǵy jos­parlary týraly baıandady.

«Eń negizgi maqsat – jumysshy maman­dardyń mártebesi men bedelin kóterý ekenin umytpaǵan jón. Bul rette barlyq múddeli memlekettik organdar, jergilik­ti ákimdikter, kásiporyndar men maman daıarlaıtyn oqý oryndarynyń úılesimdi jumysy mańyzdy. Sondyqtan josparda kórsetilgen sharalardyń merziminde ári sapaly oryndalýyn qamtamasyz etýdi tapsyramyn», dedi T.Dúısenova.

Vıse-premer jumysshy mamandar­dyń mártebesi men bedelin kóterý isi tek bir jylmen shektelmeıtinine basa mán berip, bul baǵyttaǵy jumys turaqty túrde júrgiziletinin aıtty.

Komıssııanyń kezekti otyrystary kóshpeli formatta aı saıyn ótkizilmek. Onda josparǵa sáıkes atqarylǵan sharalar saralanyp, tıisti nátıje shyǵarylyp otyrady.