Foto: Qorǵanys mınıstrligi
Ortalyq kommýnıkasııalar qyzmeti alańynda ótken baspasóz máslıhatynda QR Qarýly kúshteri Qurlyq áskerleriniń bas qolbasshysy, general-maıor Mereke Kóshekbaev atalǵan fakti boıynsha qylmystyq is qozǵalyp, tergeý bastalǵanyn aıtty.
«Qyzmettik tergeý qorytyndysy boıynsha qazanyń yqtımal sebebi qolbasshylyqtyń qaramaǵyndaǵy jeke qurammen jumys isteýde jekelegen olqylyqtardyń bolýy múmkin degen tujyrym jasadyq. Qolbasshylyq Dastannyń ishki alańdaýshylyǵyn ýaqytynda baıqaı almady, ıaǵnı oǵan moraldyq jáne psıhologııalyq qoldaý kórsetip, áskerı qyzmet jaǵdaıyna beıimdelýin anyqtaı almady», dedi QR Qarýly kúshteri Qurlyq áskerleriniń bas qolbasshysy.
Mereke Kóshekbaevtyń aıtýynsha, 8 qańtar kúni qatardaǵy jaýynger Dastan Qurmanbek týraly aqparat alǵan. Sodan soń bólim komandıri onymen jeke áńgimelesken.
«12 qańtarda ata-anasy bólimge keldi jáne telefonmen sóılesti. Qolbasshylyq Dastandy bosatty, ıaǵnı kúni boıy Dastan ata-anasymen birge boldy. Áskerı ujym ishindegi, onyń ishinde ofıserler, serjanttar arasyndaǵy qarym-qatynasqa baılanysty eshqandaı problemalar bolǵan joq. Tergeý múddesine sáıkes oqıǵanyń egjeı-tegjeıin aıta almaımyn», dedi Mereke Kóshekbaev.
