AQIU-nyń baspasóz qyzmeti habarlaǵandaı, Iordanııadan Gazaǵa gýmanıtarlyq kómek jóneltý jumysyn Azyq-túlik qaýipsizdigi jónindegi ıslam uıymynyń bas dırektory, elshi Berik Aryn, Qazaqstannyń Iordanııadaǵy elshisi Talǵat Shaldanbaı qadaǵalaǵan. Áz-Zarqa aımaǵynyń Ǵabaýı qalasyndaǵy Iordanııa Hashımıt qaıyrymdylyq uıymynyń (IHQU) qoımasynan Gazaǵa 12 júk kóligine tıelgen 200 tonna birinshi surypty bıdaı uny jóneltildi.
2023 jyldyń qazan aıynan bastap júrgizilgen shabýyldar Gaza sektorynda úıler men aýrýhanalardy qıratyp, mıllıondaǵan adamdy baspanasyz qaldyrdy. Osyǵan baılanysty 2023 jyldyń 11 qarashasynda Birikken Arab Ámirliginde ótken Islam sammıtinde azyq-túlik tapshylyǵyna jol bermeý maqsatynda shuǵyl kómek kórsetý týraly úndeý jasaldy. AQIU arnaıy Jarǵy bekitip, bul daǵdarysqa Islam yntymaqtastyǵy uıymynyń (IYU) ótinishimen gýmanıtarlyq baǵdarlamalarǵa qatysýǵa nıet bildirdi.
Buǵan qosa jyl basynda AQIU Gazadaǵy ashtyq qaýpimen kúresýge shuǵyl úndeý jarııalap, «Adamzatqa un» baǵdarlamasyn iske qosty. Gaza sektoryna 1000 tonna bıdaı unyn jetkizýdi kózdeıtin bul bastama BUU Taıaý Shyǵystaǵy palestınalyq bosqyndarǵa kómek kórsetý jónindegi agenttiginiń (UNRWA) úndeýine qoldaý kórsetti. Qazaqstan, Tájikstan, Bangladesh, Ázerbaıjan sekildi IYU-ǵa múshe memleketterdiń jomarttyǵymen, sondaı-aq Iordanııa Hashımıt qaıyrymdylyq uıymynyń seriktestigimen júzege asyrylǵan baǵdarlamanyń birinshi kezeńinde 200 tonna júk jiberildi.
Gýmanıtarlyq kómek kórsetý is-sharasynda Iordanııa Hashımıt qaıyrymdylyq uıymynyń ókilderi Iordanııa arqyly turaqty gýmanıtarlyq qoldaý kórsetý boıynsha júrgizip jatqan jumystary týraly baıandady. Aıta ketý kerek, buǵan deıin beıbit kelisim ornamaǵan ýaqytta, Izraıl bıliginiń qoıǵan shekteýleri Gazaǵa júk tasymaldaýdy aıtarlyqtaı qıyndatty. IHQU azyq-túlik qana emes, sonymen qatar medısınalyq kómek kórsetip, qaqtyǵys kezinde áleýmettik osal toptaǵy adamdardy baspanamen de qamtıdy. Uıymnyń bas dırektory Berik Aryn men elshi Talǵat Shaldanbaı uıymnyń qoımalarymen tanysyp, Gazaǵa bet alǵan kólikterge júk tıeý úderisin baqylady. Atalǵan kólikter eki kúnniń ishinde Kerem Shalom/Karam Abý Salem shekara ótkeline jetedi dep josparlanyp otyr. Ol jerde BUU Dúnıejúzilik Azyq-túlik baǵdarlamasynyń (World Food Programme, WFP) jáne BUU-nyń basqa agenttikteriniń ókilderi júkti qabyldap, qajetti jerge jetkizedi.
Bul rásim 46 myńnan asa adamnyń ómirin qıǵan 465 kúnge sozylǵan qaqtyǵystan keıin Gazada ýaqytsha atysty toqtatý kelisimimen tuspa-tus keldi. Qazir Gazada shamamen 1,84 mıllıon adamǵa azyq-túlik jetispeıdi. Olardyń 133 myńǵa jýyǵy ashtyqtyń aldynda tur. Azyq-túlik qaýipsizdigi kezeńderiniń keshendi tizbesine (IPC) sáıkes, ótken jyldyń qyrkúıeginde halyqtyń shamamen 96 paıyzy, ıaǵnı 2,15 mıllıonnan asa adam azyq-túlikke zárý bolǵan.
Bas dırektor Berik Aryn BUU seriktesterine, IHQU-ǵa jáne qaıyrymdylyq jasaǵan múshe memleketterge shynaıy rızashylyǵyn bildirdi. Sondaı-aq AQIU-nyń beıtaraptylyq, qaıyrymdylyq, adamgershilik qaǵıdattaryn ustanatynyn atap ótip, uıym árdaıym osyndaı kómek legin jalǵastyratynyn aıtty.
Sondaı-aq Syrtqy ister mınıstrliginiń resmı ókili Aıbek Smadııarov Izraıl men HAMAS arasyndaǵy atysty toqtatý týraly kelisimdi quptaıtynyn málimdedi.
«Biz Qatar, Mysyr jáne AQSh-tyń deldaldyq áreketterin joǵary baǵalaımyz. Bul – zorlyq-zombylyqty toqtatýǵa, kepilge alynǵandardy bosatýǵa, qazirgi jaǵdaıda óte qajet Gaza sektoryna gýmanıtarlyq kómek jetkizýdi kúsheıtýge múmkindik beretin mańyzdy qadam. Qazaqstan árqashan beıbitshilik pen turaqtylyqty jaqtaıdy jáne biz bul ýaǵdalastyqtar janjaldy uzaq merzimdi retteýge odan ári qadamdar jasaýǵa negiz bolady dep úmittenemiz», dedi A.Smadııarov.
Ol sondaı-aq Qazaqstan Halyqaralyq quqyq qaǵıdattarymen «eki halyq úshin eki memleket» formýlasy negizinde Palestına-Izraıl qaqtyǵysyn toqtatyp, kelisimge kelý sheshimin únemi qoldaıtynyn atap ótti.
«Palestınalyqtar da, ızraıldikter de – beıbitshilik pen qaýipsizdikte ómir súre alatyn eki táýelsiz memleket. Biz ádil jáne uzaq merzimdi beıbitshilikke qol jetkizýge baǵyttalǵan halyqaralyq kúsh-jigerdi qoldaýǵa daıynbyz», dedi SIM ókili.
Esterińizge sala keteıik, Gazadaǵy bitimgershilik 19 qańtarda kúshine endi. Izraıl sol kúni kepilge alynǵan adamdardyń tizimin alǵanyn aıtyp, bosatylatyn rastady.
