Foto: Oqý-aǵartý mınıstrligi
BBJM - oqýshylardyń bilim sapasyn, memlekettik jalpyǵa mindetti bilim berý standarttaryn (MJMBS) meńgerý deńgeıin aıqyndaıtyn ulttyq qural bolyp tabylady. 2023-2024 jyldar aralyǵynda Qazaqstan Respýblıkasynyń Oqý-aǵartý mınıstrligi BBJM halyqaralyq akkredıtteý prosesine bastamashylyq etti.
Ǵanı Beısembaevtyń aıtýynsha, BBJM ulttyq quralynyń halyqaralyq akkredıtasııadan ótýi onyń senimdiligin, shynaıylyǵyn jáne halyqaralyq sapa standarttaryna sáıkestigin rastaıdy. BBJM-niń barlyq kezeńderi men prosedýralary PISA, TIMSS jáne PIRLS sııaqty belgili zertteýlerde qoldanylatyn ǵylymı tásilderge negizdelgen.
«Qazaqstan bilim sapasyn arttyrý jolynda senimdi qadamdar jasaýda. BBJM-niń halyqaralyq tanylýy – ozyq tásilder men standarttardy engizýge baǵyttalǵan baǵdarymyzdyń durystyǵyn dáleldeıdi. Biz ýaqyttyń syn-qaterlerine tótep bere alatyn jáne jahandyq bilim berý qaýymdastyǵyna sátti ıntegrasııalanýǵa qabiletti júıe qurýdamyz. Bul jetistik bilim sapasyn odan ári arttyrýda mańyzdy kezeń bolatynyna senimdimiz», dedi mınıstr.
Halyqaralyq saraptama jáne sertıfıkattaý ǵylymı-zertteý ortalyǵynyń (RCEC) dırektory Arnold Braýer atap ótkendeı, Qazaqstannyń ulttyq baǵalaý júıesi Ortalyq Azııa aımaǵyndaǵy birlesken baǵalaý jobalarynyń negizi nemese bir bóligi bola alady.
«Qazaqstandyq bilim berý júıesi qazirdiń ózinde jaqsy nátıje kórsetýde. Yntymaqtastyqtyń eki jylynda BBJM akkredıtasııasynyń 7 kezeńi júzege asyryldy, olar baǵalaý júıesin ázirleýdi, test suraqtarynyń bazasyn qurýdy, barlyq qatysýshylar úshin nusqaýlyq ázirleýdi, sıfrlyq platformada testileýdi ákimshilendirýdi, halyqaralyq standarttarǵa sáıkes nátıjelerdi taldaýdy qamtıdy. Bul bilimdi baǵalaý júıesin damytýdaǵy mańyzdy qadam», dedi Arnold Braýer.
