Vagon ishi quqyqtyq tártip áskeri atqaratyn jaýyngerlik qyzmet jaıyndaǵy aqparattar men estelikterge toly. Sondaı-aq osy qyzmetke qatysty jádigerler men maketter qoıylǵan.
– Áskerı bólimniń qurylǵan kúnine oraı konserttik baǵdarlama uıymdastyrdyq. Oǵan áskerı bólimniń jeke quramy jáne qurmetti qonaqtar men ardagerler arnaıy shaqyryldy. Biz sarbazdar men sardarlarǵa áskerı bólimniń tereń tarıhynan syr shertip, merekelik kóńil kúı syılaımyz. Sondaı-aq is-sharaǵa aıdaýyldaý vagon murajaıynyń ashylýyn da qostyq, – dedi 6636 áskerı bólimniń komandıri, polkovnık Erlan Boranbaev.
Dástúrli qyzyl taspany áskerı bólimniń komandıri Erlan Boranbaev pen 13 jyl boıy aýdaýyldaý batalonynda qyzmet atqarǵan zapastaǵy polkovnık Amanjol Eleýqulov kesti. Osydan keıin Áskerı bólim kúnine arnaıy kelgen qonaqtar men ardagerler mýzeı ishin aralap kórdi.
– Men 22 jyl ǵumyrymdy osy áskerı bólimde ótkizippin. Búgin mýzeıge aınalǵan vagonǵa kirgende ózim qyzmet atqarǵan shaqtar eriksiz oıyma oraldy. Máselen, qabyrǵada ilingen kóne sýretter aıdaýyldaý qyzmetiniń qalyptasý kezeńderi jaıynda qundy aqparat berip tur, – dep eske aldy A.Eleýqulov.
Vagon-mýzeıdiń 6636 áskerı bóliminde ashylýynyń ózińdik bir máni bar. Cebebi 1961 jyly 20 qańtarda Tyń ólkesiniń qurylýyna baılanysty Qazaq KSR Ishki ister mınıstriniń №016 buıryǵymen Qazaq KSR IIM ishki kúzetiniń 246 jasaǵy qurylyp, oǵan №6636 ataýy berilgen edi. Onyń quramyna Petropavl, Qostanaı, Pavlodar, Atbasar qalalarynda, Jolymbet, Vıshnevka, Qusmuryn, Alekseevka kentterinde ornalasqan 10 komanda jáne 2 jeke top endi. Jasaq shtaby Selınograd qalasynda ornalasty. Bólimniń jeke quramy qurylǵan sátten bastap eńbekpen túzeý kolonııalaryn kúzetý jónindegi mańyzdy mindetterdi oryndady. Sottalǵandardy jáne sot prosesteri barysynda qamaýǵa alynǵan adamdardy, sondaı-aq avtokólik jáne temirjol baǵyttary boıynsha Aqmola garnızonynyń áskerı sotynda aıdaýyldaýdy júzege asyrdy.
Is-shara barysynda Ulttyq ulan Án-bı ansambliniń solısteri men bıshileri áskerı bólimniń sahnasynda óner kórsetip, Qaraótkel aýyldyq okrýginiń oqýshylarynan quralǵan «Serper» toby áskerı qyzmetshilerge kúıden shashý shashty. Sondaı-aq Otan aldyndaǵy qyzmetin abyroımen atqaryp júrgen bir top áskerı qyzmetshi men sarbazdar marapattaldy.
Aıta ketsek, qazirgi ýaqytta bólimniń jeke quramy Aqmola garnızony sottarynyń qaraýyldaryn qamtamasyz etý boıynsha qyzmet atqarady, sondaı-aq IIM Ulttyq ulanynyń Bas qolbasshylyǵyn materıaldyq jáne qyzmettik qamtamasyz etýmen aınalysady. Munda ár jarty jyl saıyn azamattar elimizdiń túkpir-túkpirinen áskerge shaqyrylyp, ant qabyldap, sapqa qosylady.
