Sharaına
Iordanııa basshylyǵy «Islam memleketi» delinetinniń ótken jyldyń aıaǵynda tutqynǵa túsken áskerı ushqyshty tirideı órtep jiberýine kek qaıtarý maqsatynda qamaýdaǵy terrorshy áıel Sadjıda Ál-Rıshavıdi óltirdi.
Jaqyn kúnderi basqa da terrorshylar ólim qushpaq. Al Iordanııa koroli Abdalla II ushqysh Moaz Ál-Kassabehtiń qazasyna oraı, AQSh-qa saparyn úzip elge oralǵan soń, halyqqa beıneúndeý joldady. Kóshege shyqqan jurtshylyq ókilderi de Sırııa aýmaǵyndaǵy «Islam memleketi» jasaqtaryna soqqy berip, kek qaıtarǵylary keletinin atap kórsetti. Buǵan deıin Iordanııa úkimeti Ál-Kassabehti jankeshti Ál-Rıshavıge aıyrbastaý týraly kelisimge barýǵa daıyn ekenin málimdegen edi.
Nóser jańbyrdyń zardaby aýyr
Balqan memleketteri nóser jańbyr týyndatqan tabıǵat apatynan úlken zardap shekti. Máselen, Makedonııada tótenshe jaǵdaı jarııalandy.
Albanııa fermerleriniń jerlerin qarǵyn sý basyp qalýy saldarynan olar úlken shyǵynǵa ushyrady. Bolgarııadaǵy jaǵdaı da ońyp turǵan joq. Júzdegen adam tikushaqtarmen qaýipsiz jerlerge jetkizilgen. Kóptegen úıler jermen-jeksen bolyp qıraǵandyqtan, myńdaǵan adam baspanasyz qalyp otyr. Makedonııadaǵy, Albanııa men Bolgarııadaǵy keıbir eldi meken turǵyndary qazirgi tańda kúnkóris kózinen múldem aırylǵan. Endi olardyń bar úmiti memleket tarapynan beriletin járdemge baryp tireledi. Al el úkimetteri bolsa ázirshe eshkimge eshqandaı ýáde berip otyrǵan joq.
500 myń eýrodan aıyryldy
Kıprlik kedenshiler atalǵan aral memleketten 500 myń eýrony Afınaǵa alyp ótpekshi bolǵan grekııalyq bıznesmenniń joǵary somadaǵy qolma-qol aqshasyn tartyp aldy. Bul týraly «Reıter» agenttigi habarlady.
Aty-jóni aıtylmaıtyn kásipker kıprlik bankter jarty mıllıon eýrony esepke alýdan bas tartqannan keıin osynaý mol aqshamen eline ushpaqshy bolǵan. Grekııa turǵyny osy úlken somany Kıprge 200 jáne 500 eýrolyq kýpıýralarmen qol júgine salyp ákelgen. Keden qyzmetkerleriniń paıymynsha, bankter grekııalyqtyń aqshasyn ony qaıdan alǵany týraly qujaty bolmaǵannan keıin jáne shekaradan ótken kezde deklarasııalamaǵan soń esepke qoımaǵan. Al Kıpr zańdaryna sáıkes, 10 myń eýrodan asatyn soma kedende deklarasııalanýy tıis.
Taıvanda ushaq apatqa ushyrady
Taıvanda jolaýshylar ushaǵy apatqa ushyraǵan bolatyn. Áýelde 12 adam qaza taýyp, 16-sy qutqaryldy jáne 30-y iz-túzsiz joǵalyp ketti delinse, sońǵy málimet boıynsha kóz jumǵandar sany 19-ǵa deıin jetip otyr.
TransAsia avıakompanııasynyń atqarýshy dırektory Chen Chınde ushaqtyń qulaǵany úshin qaza bolǵan jolaýshylardyń týǵan-týysqandarynan keshirim ótingen. ATR 72-600 ushaǵynyń bortynda jolaýshylar men ekıpaj múshelerin qosa alǵanda 58 adam bolypty. Al ol el astanasy Taıbeıge jaqyn mańda áýege kóterilgen soń birneshe mınýttan keıin ózenge qulap túsken. Jolaýshylardyń 31-i qurlyqtyq Qytaıdan kelgen týrıster kórinedi. Al áýege kóteriler aldynda ushaq qanatymen avtomobıl estakadasyn jáne onyń ústinde turǵan taksıdi qaǵyp ketken.
Poıyz ben djıp soqtyǵysyp qaldy
AQSh-tyń eń úlken megapolısi – Nıý-Iork qalasynyń túbindegi Velhalla aýdanynda poıyz ben jolsyz jerlermen júrýge arnalǵan djıp kóligi soqtyǵysyp qaldy. Apat saldarynan shyqqan órtten 6 adam ómirimen qoshtasty. Taǵy 12 adam zardap shekken.
Lokomotıv djıpti 10 vagondaı jerge súırep aparǵan. Al avtomobılde paıda bolǵan órt poıyzdy da sharpyp, birinshi vagonda órt shyqqan. Oqıǵa ornyna órt sóndirýshiler men dárigerler tez jetkenimen, adam óliminiń aldyn alyp úlgermegen. Poıyzda barlyǵy 800 jolaýshy kele jatsa kerek. Olardyń 400-in qutqarýshylar jergilikti sport ortalyǵyna jetkizipti. Jolaýshylardy dittegen jerlerine aparý úshin oqıǵa ornyna ondaǵan avtobýs attandyrylǵan.
О́z qolyn ózi kesken qytaılyq jas
Qytaıdyń Szıansý provınsııasyndaǵy Nantong qalasynda 19 jasar qytaılyq kompıýter oıynynan ózin arashalap alý úshin, ıaǵnı kompıýterge táýeldilikten qutylý úshin óz qolyn ózi kesken. Jas jigit úıinen arnaıy alyp shyqqan as pyshaǵymen qolyn bilektiń túbinen kesip tastaǵan.
Sodan keıin Van esimdi qytaılyq taksı shaqyrtyp, aýrýhanaǵa ketse, qoly ózi otyryp kesken oryndyq ústinde qala bergen. «Bul oqys oqıǵa mıymyzǵa qonbaıdy. Ol qashanda ár isin kesip-piship isteıtin aqyldy bala edi», deıdi jasóspirimniń anasy. Ol, sondaı-aq, úıinen shyǵarda anasyna qaǵaz jazyp qaldyrypty. Onda: «Mama, men aýrýhanaǵa kettim, ýaıymdama. Keshke kelemin», dep jazylǵan eken. Polısııa qyzmetkerleri qolynyń qaldyǵyn taýyp aýrýhanaǵa aparǵannan keıin dárigerler ony jas jigitke ota jasap tigip beripti.
Qysqa qaıyryp aıtqanda:
*Reseı syrtqy ister mınıstri Sergeı Lavrov óleńderin «Rýsskıı pıoner» jýrnalynda jarııalaǵan. Toptamaǵa Lavrovtyń ertedegi úsh óleńi kiripti. Lavrov atalǵan laýazymǵa 2004 jyly kelse, oǵan deıingi 10 jylyn Reseıdiń BUU-daǵy turaqty ókili retinde ótkizgen bolatyn.
*Grýzııanyń shyǵysyndaǵy Kahetııada adamǵa pyshaqpen shabýyl jasaǵany úshin eki jylǵa bas bostandyǵynan aıyrylǵan er adam sot zalynan qashyp ketken. 21 jastaǵy Dmıtrıı Hachıashvılı arnaıy temir qorshaýǵa qamalǵan eken. Ol jaqyn turǵan ústeldegi kiltti bildirtpeı alyp esikti ashqan soń, terezeden sekirip ketse kerek.
*2004 jyldyń qorytyndysy boıynsha, Reseıde shoshqa etiniń óndirisi 4,7 paıyzǵa, ıaǵnı 207,8 myń tonnaǵa ósipti. Reseı aýyl sharýashylyǵy mınıstrliginiń derekterine qaraǵanda, sharýashylyqtar shoshqa sanyn 19,6 mıllıon basqa deıin jetkizgen.
*AQSh-tyń Tehas shtatyndaǵy San-Antonıo meıramhanasy klıentter tartý úshin ózinde qyzmet kórsetetin daıashylardy ishki kıimderine deıin sheshindirý qadamyna barǵan. Meıramhana ıesi Mılo Lınannyń sózine qaraǵanda, ol mekemeni osydan eki aı buryn ashypty. О́zi de birneshe jyl boıy daıashy bolyp jumys istegen kórinedi.
Internet materıaldary negizinde ázirlendi.
