Shaǵyn sehtan bastalǵan bıznes

«Iýtarııanyń» Jezqazǵan, Qara­ǵandy qalalaryndaǵy avtomat­tan­dyrylǵan jabdyqtarmen jaraq­tan­dyrylǵan 2 zamanaýı tigin fabrıkasy men Astana qalasyndaǵy toqý óndirisi naryqqa keńinen tanymal. Jezqazǵan, Sátbaev, Qaraǵandy, Balqash, Astana qalalarynda jalpy aýmaǵy 3 myń sharshy metrdi qamtıtyn ortalyq qoımalarynyń bolýy kompanııanyń zor qýaty men mol múmkindigin aı­ǵaqtaıdy. Kompanııa jylyna 1 800 myńnan asa tigin buıymyn shyǵarady. Bul ozyq tehnologııany óndiriske engizip, qoldanýdyń arqasynda múmkin bolyp otyr.

Metallýrgııa, taý-ken, munaı-gaz, hımııa, temirjol, energetıka sa­la­­larynyń qyzmetkerleri úshin arnaıy kıimder, er, áıel men balalar kıimderi, kúndelikti qoldanysqa arnal­ǵan toqyma buıymdary, bar­lyǵy 500-den astam kıim úlgisin usy­­nady. Germanııanyń Durkopp Adler, Pfaff, Amf Reece, Japonııanyń Shima Seiko, Epson, Mimaki, Juki, Tajima, Túrkııanyń Abitech, Tesan, Qytaıdyń ZOJE tárizdi zamanaýı ozyq tigin tehnologııalary kompanııa ónimderiniń «Sapa bárinen de joǵary» deıtin uranyna sáıkes bolýyn qamtamasyz etýde. Árıne, sol tehnologııanyń tilin taýyp júrgen kimder? О́zimizdiń qyz-jigitter. Sáýle Baqytjanqyzy mamandardy kompanııa esebinen oqytyp, tárbıeleýge basa kóńil bóledi.

О́ndiristi basqarýdyń avto­mat­tan­dyrylǵan júıesi shıkizat tús­ken sátten bastap daıyn ónimdi sa­týǵa deıingi, ıaǵnı jumysty ońtaı­lan­dyrý, baqylaý, esep júrgizýdi tolyq baqylaýǵa múmkindik beredi. Kompanııa kásiporyndarynda engi­zil­gen sıfrlyq tehnologııalardyń birin «Iýtarııa» mamandarynyń ózderi ázirlegen. «Yutariya Smart Technologies» dep atalatyn bul avto­mat­tandyrylǵan baǵdarlama jeke qor­­ǵanys quraldaryn berýdi josparlaý men esepke alýǵa arnalǵan.

Aıaǵynan nyq turǵan kompanııa birneshe ınvestısııalyq jobany júzege asyrdy. 2012 jyly Jez­qaz­ǵan qalasyndaǵy tigin óndirisi keńeı­til­di. Zamanaýı tigin, pishý, kesteleýge arnalǵan avtomattandyrylǵan jab­­dyq­tar ornatyldy. Jańa ınvestı­sııa­nyń nátıjesinde 250 jumys orny ashyldy. Sol jyly kompanııa taǵy bir ınvestısııalyq jobany júzege asyrdy. Monoqalalardy damytý baǵ­darlamasy sheńberinde Shyǵys Qazaqstan oblysynda, Qaraǵandy, Balqash, Sátbaev qalalarynda «Indýs­trııa­lyq qyzmet kombınaty» dep ata­latyn keshen qu­ryl­dy. Sonyń aıasynda tapsyrys berý­shilerge, qarapaıym turǵyndarǵa taza­laý, qyzmet kórsetý servısiniń óndiristik sıkli usynyldy. Bul jobany júzege asyrýǵa 180 mln teńge jum­salyp, ja­ńadan 350 jumys orny ashyldy.

2011–2013 jyldary «Astana – jańa qala» erkin ekonomıkalyq aımaǵynda «KazTexExpo» avtomattandyrylǵan óndiristik kesheniniń qurylysy júrgizildi. «Indýstrııalandyrý kartasy» memlekettik baǵdarlamasyna engizil­gen bul jobany júzege asyr­ǵan «Iýtarııa» kompanııasy bola­tyn. Sonyń nátıjesinde, 350 jumys orny ashylyp, bul jobaǵa 560 mln teńge kóleminde ınvestısııa quıyl­dy. Munda tiginshilik, toqyma, eks­pe­rı­menttik sehtar jumys istep, kom­pıýterlik baǵdarlamalar iske qosyldy. Kıim úlgilerin jobalaý júıesi engizildi. «Astana Iýtarııa ltd» JShS munda jumyskerlerge arnalǵan kıimderden bastap bıznes ókilderine de jarasymdy kıim úlgilerin usyndy. Áskerı kıimder tigýge de memleket tapsyrysyn jeńip aldy.

200 mln teńge ınvestısııa jumsap uıym­dastyrylǵan kólik-logıs­tı­ka­lyq ortalyǵynyń aýmaǵy 4 600 sharshy metrdi quraıdy. Júktiń der kezinde jetkizilýin qadaǵalap, qamtamasyz etý maqsatynda ortalyq­tan­dyrylǵan dıspecherlik qyzmet quryldy. Ortalyq ǵımaraty kúr­deli jóndeýden ótkizildi, jańasha jab­dyq­taldy. Ortalyqta 47 júk kóligi turaqty tasymalmen aınalysady, buǵan qosa temirjol qyzmeti de paıdalanylady.

2022 jyly 2 500 sharshy metr aýmaqty alyp jatqan kóterme-tara­tý ortalyǵyn uıymdastyrdy. Buǵan jumsalǵan 802 mln teńge ınvestısııa óziniń tıimdiligin baıqatqan soń, kompanııa qazir 150 mln teńge qarajat qarastyryp, osyndaı taǵy bir ortalyq uıymdastyryp jatyr. Byltyr jel­toq­sanda kompanııa qoldaýymen Jez­qazǵan qalasynda «Ulytau Creative Hab» ashyldy. Ulytaý oblysynda kreatıvti ındýstrııany damytýǵa yq­­pal etetin mádenı mura men zamanaýı tehnologııalardy biriktiretin hab jańa jo­balardy iske asyratyn startaptar men shaǵyn jáne orta bızneske qoldaý kórsetedi. О́ńirdegi kreatıvti ındýstrııany damytýdy maqsat etken hab elektrondy jáne keńse jabdyqtarymen, kitaphanamen, jıhazben jabdyqtaldy. Munda qazir 3D fashionLab – ıaǵnı, kıimdi modeldeý boıynsha ZD zerthanasy, sondaı-aq, zergerlik, lazerlik, qolónershiler, dombyra men qobyz sheberhanalary, Kazakh Ou Lab, Steppe Art Lab, Qazaq Heritage Lab, Steppe Tradition Lab, e library, Qazaq Style Lab, Palette Lab, digital Lab ornalasqan. Habtyń jumys isteýine jaıly jaǵdaı týǵyzý úshin «Iýtarııa» 15 mln teńge jumsady jáne 400 sharshy metr aýmaqty tegin usyndy. Maqsat – aımaqtaǵy kásip­kerlerdiń kreatıvti jobalaryn jú­zege asyrýǵa járdemdesý. Nátı­je­sin­de, jańadan 50 jumys orny paıda boldy.

«Naryq álemine engenimizge shırek ǵasyrǵa jýyqtady. Ýaqytpen birge óstik, órkendedik. Shaǵyn jáne orta kásipkerlikti damytýǵa memleket tarapynan jasalǵan qamqorlyqtyń kóp sharapaty tıdi. Kásipkerlik jolyn kezinde qandaı qıyndyqpen bas­­­ta­ǵanymyz esimnen ketpeıdi. Búginde «Iýtarııa» quramynda 700-den asa jumyskeri bar iri óndiristik ın­novasııalyq kompanııaǵa aınaldy. Bizdegi ortasha jalaqy 323 myń teńgeni quraıdy. Kompanııa 2021-2024 jyldary bıýdjetke 3 325 256 myń teńge salyq tólegen eken. Bul bizdegi óndiristiń deńgeıin kórsetedi. Biz áleýmettik baǵyt ustanamyz. Kóptegen qaıyrymdylyq sharasyna qatysamyz, demeýshilik kórsetemiz. Kompanııa qyzmetkerleri men jumyskerleri de negizinen Qaraǵandy jáne Ulytaý oblysynan shyqqan jergilikti mamandar», deıdi Sáýle Baqytjanqyzy.

Ulytaý oblysy