Rım Papasy rıza bolǵan qazaq mýzykanty

Búgingi sóz tanymal skrıp­kashy Erasyl Hamıt týraly. Onyń ónerine Rım Papasy Fransısk erekshe rıza bolypty. Qazaq balasynyń Papamen kezdesý sapary bir jyl buryn josparlanypty. Vatıkan ókili onyń Venadaǵy jeke konsertine arnaıy baryp, týma talanttyń ónerine tánti bolyp qaıtqannan keıin kóptegen  kezdesý uıymdastyrylypty.

«Venada jeke konsertim ótti, oǵan Vatıkan elshisi qatysty. Onyń maquldaýynan keıin biz qyrkúıek aıynda Rımge sońǵy kezdesýge bardyq, sol jerde kardınal men onyń kómekshisine shaǵyn jeke konsert berdik. Tek osydan keıin konserttiń ótetini tolyq sheshildi. Kezdesý keremet ótti. Rım Papasymen tildesý sáti de tústi. Ol óte qarapaıym jáne meıirimdi kisi eken. Dástúr bo­ıynsha, júzdesý barysynda ­onyń júzigin súıip, tize búgý kerek ­edi. Biraq ol mundaı rá­simniń qa­jeti joǵyn aıtyp, qol alysýdyń ­jet­kilikti ekenin bildirdi. Kon­sert ba­rysynda Papa Fransısk oı­na­ǵan mýzykany muqııat tyń­dap, birneshe ret basyn ızedi. Muny onyń rıza bolǵanynyń belgisi dep qabyldadym. Men oǵan argentınalyq kompozıtor A.Pıassolanyń «Lıbertan­go­­sy» oryndadym. Rım Papasy qat­ty áserlenip, bul týyndy oǵan týǵan jerin eske salǵanyn aıt­ty. Kez­desý sońynda maǵan Papa­nyń qolynan aıqysh belgisi men batasyn alý qurmeti buıyrdy. Bul men úshin sáýleli sáttiń biri bolmaq», deıdi Erasyl Hamıt aǵy­nan aqtarylyp.

Keıipkerimiz M.Vengerov, N.Snaıder, M.Martın, T.Samýıl sııaqty  álemge áıgili mýzykanttardan jeke sabaq pen sheberlik dárisin alǵan mýzyka mamany. Erasyldyń tynymsyz qulshynysy oǵan óz salasynda keremet nátıje syılady. Aıtalyq, ol Kronberg (Germanııa), San-Jan-de-Lıýzdegi «Ravel» fes­tıvali (Fransııa), «Lak Leman» fes­tıvali (Shveısarııa), Bol­sano festıvali (Italııa), Gra­fenegg festıvali (Aýstrııa) sekil­di halyqaralyq mýzykalyq fes­tı­val­derge qatysyp, óz ónerin kór­setti. Sonymen qatar Gýstav Ma­ler atyndaǵy akademııanyń qatysýshysy bolyp, Grafenegg akademııasyna eki ret qatysqan.

Erasyl Hamıt Almaty qala­synda dúnıege kelgen. Rımskıı-Korsakov atyndaǵy konservatorııa janyndaǵy arnaıy orta mýzykalyq mektepte bilim alǵan. Sankt-Peterbýrgte oqyǵan ke­zin­de ol Mravınskıı baıqaýy, «Vıvat Talant» jáne basqa da halyqaralyq baıqaýlardyń laý­reaty atandy. Sondaı-aq ol Sankt-Peterbýrgtiń kame­ra­lyq jáne sımfonııalyq or­kestr­lerimen birge birneshe ret óner kórsetti. 2013 jyly bilimin jalǵastyrý úshin Máskeýdegi P.Chaıkovskıı atyndaǵy konservatorııanyń ortalyq mýzyka mektebine professor, kafedra meńgerýshisi Ser­geı Kravchenkonyń synybyna qabyldandy. 

Osydan keıingi Erasyl Hamıt­tiń óner sapary Zalsbýrg qala­syndaǵy Mosarteým ýnıver­sıtetinde jalǵasty. Onda óner­paz óren professor P.Amoıal­dyń synybyna oqýǵa túsip, bi­limin shyńdady. Qazirgi ýaqyt­ta Erasyl Vena­daǵy Mýzyka jáne oryndaýshy­lyq óner ýnı­ver­sıtetinde professor A.Da­naı­lovanyń synybynda oqyp jatyr. Mýzyka memleketterdiń má­denı baılanysyn damytýǵa sep­tigin tıgize­tin salanyń biri. Dúnıejúzilik deńgeıdegi oqý ordalarynan bilim alyp, elaralyq mádenı  baıla­nysty nyǵaıtýǵa úles qosyp júrgen Erasylǵa óneriń órleı bersin deımiz.