Foto: Aqorda
Prezıdentke kompanııanyń byltyr atqarǵan qyzmetiniń nátıjeleri, qarjylyq jaǵdaıy, sondaı-aq damýdyń perspektıvti baǵyttary týraly esep berildi. Ásel Janasovanyń aıtýynsha, sońǵy eki jylda «Qazposhta» taza tabys taýyp, bıýdjetke 45 mıllıard teńge kóleminde salyq jáne baj alymdaryn tóledi.
Qasym-Jomart Toqaevqa kompanııa Dúnıejúzilik poshta odaǵynyń reıtıngisi boıynsha alǵash ret eń úzdik 50 poshta operatorynyń qataryna kirgeni jóninde baıandaldy. Tasymal úderisin ońtaılandyrý esebinen poshtalyq jóneltilimderdiń kólemi 26 paıyzǵa ósti. Atap aıtqanda, 20 mıllıon, sonyń ishinde 9 mıllıon halyqaralyq sálemdeme jetkizilgen.
Memleket basshysyna HomePost jobasynyń júzege asyrylý barysy tanystyryldy. Atalǵan bastama aıasynda úı janyndaǵy dúkender aýmaǵynda tapsyrystardy berýge arnalǵan 180 pýnkt ashyldy. Bıyl olardyń sany 1 myńǵa jetedi. YTO Express kompanııasymen yntymaqtastyq sheńberinde poshtalyq ınfraqurylymdy jańǵyrtýǵa 50 mıllıon dollar kóleminde ınvestısııa tartyldy.
«Qazposhta» AQ basqarma tóraǵasy Prezıdentke qyzmet sapasyn jaqsartý maqsatynda engiziletin ınnovasııa jaıynda aıtty. Osy oraıda Japan Post, Toshiba jáne Cainiao kompanııalarymen kólik jáne logıstıka salalarynda birlesken jobalar júzege asyrylyp jatyr. Budan bólek, halyqaralyq marketpleısterge qoljetimdilikti qamtamasyz etetin Keruen servısi damyp keledi.
Qasym-Jomart Toqaevqa Aqtóbe áýejaıynda mýltımodaldy qoıma salý josparlanyp otyrǵany jóninde aıtyldy. Aýmaǵy 15 myń sharshy metr bolatyn bul nysan Túrkııanyń S-Sistem kompanııasymen seriktestik negizinde boı kóteredi.
Kezdesý sońynda Memleket basshysy kompanııanyń qarjylyq jaǵdaıyn jaqsartý, elimizdiń TMD-ǵa baǵyttalǵan kólik-logıstıka áleýetin elektrondy saýda salasynda damytý jáne sıfrlyq sheshimder engizý boıynsha jumystardy jalǵastyrýdy tapsyrdy.
