Ol eki gazettiń memleket tutastyǵy men halyq birligine qosqan eleýli eńbegin atap ótti.
«Alǵashqy sany jaryq kórgennen bastap qos basylym elimizdi órkendetý jáne berekeli birligimizdi nyǵaıtý isine ólsheýsiz úles qosyp keledi. Qazaqtyń birtýar perzentteri negizin qalaǵan gazetterde oıy ushqyr sóz zergerleri qyzmet etti. Olar halyqtyń sózin sóılep, ult máselesin bárinen bıik qoıdy», dep jazylǵan quttyqtaý hatynda.
Sondaı-aq Prezıdent jýrnalısterdiń basylymnyń dańqty jolyn abyroımen jalǵastyryp kele jatqanyn tilge tıek etti.
«Ǵasyrdan astam ýaqyt ishinde bul aqparat quraldary qazaq jýrnalıstıkasynyń qara shańyraǵyna aınaldy. Jasampaz isterdiń jarshysy, oqyrman qaýymnyń rýhanı shamshyraǵy retinde tanyldy. Búginde bul basylymdardyń qyzmetkerleri aǵa býyn salǵan sara joldy laıyqty jalǵastyryp keledi. Sizder ulttyń jańa sapasyn qalyptastyrý jolynda qajyrly eńbek etip júrsizder.
Aldaǵy ýaqytta da shynaıy aqparat pen sapaly saraptamany basshylyqqa alyp, óz mindetterińizdi abyroımen atqara beresizder dep senemin.
Barshańyzǵa rızashylyǵymdy bildiremin jáne baq-bereke, tolaıym tabys tileımin!», dedi Qasym-Jomart Toqaev.
