Sýretti túsirgen – Jumabaı MUSABEK
Kásiporyn «Qorǵas-Shyǵys qaqpasy» arnaıy ekonomıkalyq aımaǵynda ornalasady. Jel generatorlary zaýytynyń óndiristik qýaty – jylyna 2 GVt generasııa. Energııany jınaqtaý júıelerin shyǵarý qýaty – jylyna 1 GVt. Jobaǵa 40 mln dollar ınvestısııa salynǵan. Keshen elimizdegi «jasyl» energetıkanyń damýyna, ekologııanyń jaqsarýyna jáne jalpy ekonomıkalyq damýǵa oń áser etpek.
Investısııalyq jobany «Qazaqstandyq kommýnaldyq júıeler» JShS men qytaılyq «Envision Energy» kompanııasy birlesip iske asyrady. Kásiporyn jyl saıyn jel generatorlarynyń 250 jıyntyǵyn jáne energııany jınaqtaý júıeleriniń 100 jıyntyǵyn shyǵarmaq. Kapsýla salý rásimine qatysqan oblys ákiminiń orynbasary Áset Qanaǵatov óńirdiń ekonomıkalyq ósýiniń mańyzdy núkteleriniń biri retinde «Qorǵas – Shyǵys qaqpasy» arnaıy ekonomıkalyq aımaǵyn damytýǵa basa nazar aýdardy.
«Qytaıdan TMD elderine, Eýropa men Azııaǵa shyǵatyn mańyzdy baǵyttardyń qıylysynda oblystyń ekonomıkalyq ósý núktesiniń biri Qorǵas toraby ornalasqan. Toraptyń mańyzdy ári ınvestorlar úshin tartymdy elementi – «Qorǵas-Shyǵys qaqpasy» arnaıy ekonomıkalyq aımaǵy. Búginde erkin ekonomıkalyq aımaqqa qatysýshylardyń biryńǵaı tiziliminde jalpy quny 907 mlrd teńge bolatyn jobalary bar 68 qatysýshy tirkelgen. 2030 jylǵa deıin 47 jobany iske asyrý josparlanýda. AEA aýmaǵynda 51 mlrd teńgeden astam somaǵa 21 joba iske asyryldy. Jel generatorlary men energııa jınaqtaý júıelerin shyǵaratyn zamanaýı zaýyttyń qurylysy – memleket pen bıznestiń tıimdi birlesken jumysynyń aıqyn nátıjesi», dedi Á.Qanaǵatov.
«Qazaqstandyq kommýnaldyq júıeler» JShS baqylaý keńesiniń tóraǵasy Dinmuhamet Idrısov kásiporynnyń iske qosylýy jel generatorlary men energııa jınaqtaý júıeleriniń óndirisin jolǵa qoıýǵa ǵana emes, sonymen qatar zamanaýı tehnologııalardy tartýǵa múmkindik beredi deıdi.
«Jobany iske qosý ımportqa táýeldilikti qysqartady, energetıkalyq qaýipsizdikti nyǵaıtady, jumys oryndaryn qurady, eksporttyq múmkindikti keńeıtip, tómen kómirtekti ekonomıkaǵa kóshýdi jedeldetedi. О́ndiristiń bastapqy kezeńinde otandyq qamtý úlesi 30% bolady. Bolashaqta kezeń-kezeńimen 90%-ǵa jetkiziledi», dedi D.Idrısov.
Kásiporyn 2026 jyldyń III toqsanynda iske qosylmaq. О́nimniń 60%-y ishki naryqqa, 40%-y Ortalyq Azııa men Kavkaz elderine eksporttalady.
Jetisý oblysy
