Túrkistan oblysynda «Aýylda densaýlyq saqtaýdy jańǵyrtý» ulttyq jobasy aıasynda byltyr 49 medısınalyq-sanıtarlyq alǵashqy kómek nysandary paıdalanýǵa berildi. Onyń 20-sy – dárigerlik ambýlatorııa, 23-i – feldsherlik-akýsherlik, 6-aýy – medısınalyq pýnkt. Jańadan ashylǵan nysandarda sanıtarlyq talaptar, órt qaýipsizdigi saqtalǵan, zamanaýı medısınalyq qural-jabdyqtarmen jabdyqtalǵan, kadrlyq qurammen tolyq qamtylǵan. Aıtalyq, jýyrda paıdalanýǵa berilgen Otyrar aýdanynyń Aqqum aýylyndaǵy dárigerlik ambýlatorııada dáriger, 6 meıirger, akýsher, stomatolog, laborant, avtokólik júrgizýshisi, kishi býyn qyzmetker, eki qaraýyl jumys isteıdi.
Dárigerlik ambýlatorııa EKG, gınekologııalyq oryndyqtarmen, fızıoterapııalyq, ońaltý apparattarmen qamtylǵan. Saýran aýdanyna qarasty Jalańtós aýylynda el ıgiligine berilgen medısınalyq beket 250-den asa turǵynǵa qyzmet kórsetedi. Aýylda buǵan deıin 1973 jyly salynǵan medısınalyq pýnkt jumys istep kelgen. Alaıda eski ǵımarat «apattyq jaǵdaıda» dep tanylyp, aýyl turǵyndarynyń dárigerlik kómek alýy barysynda qıyndyqtar týǵyzdy. Endi turǵyndar zamanaýı talaptarǵa saı, jańa ǵımaratta qyzmet ala alady.
Ulttyq joba aıasynda júrgizilgen jumystar nátıjesinde aýyldar men eldi mekenderdiń 100 myńnan astam turǵynyna medısınalyq kómek kórsetiledi. Aıta ketelik, 49 nysannyń 48-i memleket qarjysyna salynsa, Keles aýdany, Oshaqty aýylyndaǵy nysandy jeke ınvestor salyp berdi. Iаǵnı aýyldastaryna medpýnkt salyp berýge qyzyǵýshylyq tanytyp otyrǵan qaltalylardyń qarasy kórinbeıdi, aýyl medısınasyna ınvestor tartý ázirge múmkin bolmaı otyr. Aýyldarda medısınalyq qyzmettiń qoljetimdiligin arttyrý baǵytynda birqatar joba júzege asyrylmaq.
«Qazirgi tańda 2025-2026 jyldary salý josparlanǵan jalpy 58 medısınalyq nysanǵa qajettilik bar. Onyń 25-in bıyl iske asyrý josparlanyp otyr. Qalǵan 33-iniń qurylysy keler jyldyń enshisinde. Osynyń bári júzege asqan jaǵdaıda óńirdegi medısınalyq, feldsherlik-ambýlaratorııalyq pýnktter men dárigerlik ambýlatorııalardyń qajettiligi tolyq sheshimin tabady», deıdi oblys ákiminiń orynbasary Beısenbaı Tájibaev.
Oblys halqynyń 80 paıyzy aýyldy jerde turatynyn eskersek, atalǵan ulttyq jobanyń sapaly júzege asyrylýy, sondaı-aq turǵyndarǵa medısınalyq kómektiń der kezinde kórsetilýi asa mańyzdy. Bul oraıda óńirde jedel medısınalyq qyzmettiń jumysy barlyq aýdanda jaqsy deı almaımyz. Oblystyq densaýlyq saqtaý basqarmasy mamandarynyń málimdeýinshe, 60 brıgada jetispeıdi. Iаǵnı óńirdiń jedel járdem brıgadasymen qamtylýy – 71%. «Oblystyq jedel medısınalyq járdem stansasy» MKK-da jalpy 150 brıgada óńirdegi 2 mıllıonnan astam halyqqa medısınalyq jedel járdem qyzmetin kórsetip keledi. Onyń ishinde, dárigerlik 34, feldsherlik 116 brıgada, 4-sanattaǵy jedel járdem qyzmet kórsetýge arnalǵan 75 brıgada jumys isteıdi. Normatıvke sáıkestendirý úshin, ıaǵnı halyq sanyna oraı óńirde 210 brıgada bolýy tıis. Jedel járdem brıgadasynyń jetispeýshiligi, ásirese Saýran aýdanynda baıqalady. Sondaı-aq halqy 222 myńǵa jýyq Saryaǵash aýdanynda – 9, 135 myńǵa jýyq turǵyny bar Keles aýdanynda – 6, 85 myńǵa jýyq turǵyny bar Shardara aýdanynda 4 brıgada jetispeıdi.
О́ńirdegi 197 sanıtarlyq avtokóliktiń 48,2 paıyzy tozǵan, 20 avtokólik kúrdeli jóndeýdi qajet etedi. Oblystyq sanıtarlyq avıasııa qyzmetiniń avtoparki ótken jyly sońǵy úlgidegi arnaıy tehnıkalarmen jabdyqtalǵan zamanaýı 15 kólikpen tolyqty. 13 jańa avtokólik 4-sanatty shaqyrtýlarǵa qyzmet etýge berilse, oblystyq ákimdiktiń qoldaýymen jergilikti bıýdjet esebinen jańa týǵan nárestelerdi tasymaldaýǵa arnalǵan 2 reanımobıl avtokóligi satyp alynǵan. Bıyl taǵy qosymsha 60 jedel járdem avtokóligin satyp alý josparlanyp otyr. Degenmen jedel járdemniń keıbir aýdandardaǵy shalǵaı aýyldarǵa keshigip jetetini jasyryn emes. Mysaly, ótken jyly keshigýmen oryndalǵan shaqyrtýlar kórsetkishi Shardara aýdanynda – 9,3%, Atakentte – 8,9%, Qazyǵurt aýdanynda 8,7% bolǵan. Aýrýhanaǵa deıingi ólim-jitim, ásirese Túrkistanda, Saryaǵash, Saıram, Ordabasy aýdandarynda kóp. Jedel járdem qyzmetine Sozaq, Saryaǵash, Otyrar aýdandarynda shaǵymdanýshylardyń qarasy qalyń. Byltyr óńirdegi jalpy shaqyrtýlar sany 758 767 bolsa, onyń ishinde tynys alý, qan-tamyr júıesi aýrýlaryna qatysty shaqyrtý kóp bolǵan.
О́ńirdegi densaýlyq saqtaý salasyndaǵy taǵy túıtkildi máseleniń biri – kadr tapshylyǵy. Densaýlyq saqtaý basqarmasynyń málimetine súıensek, oblysta 400-den astam beıindi maman jetispeıdi. Onyń 141-i Túrkistan qalasynda salynyp jatqan 570 tósek-oryndy oblystyq kópbeıindi aýrýhanaǵa qajet. Bul problemany sheshý maqsatynda oblys ákimdigi medısınalyq mekemelerdi tıisti mamandarmen qamtý jóninde 5 jyldyq jospar bekitken. Osy oraıda oblystyq bıýdjet esebinen rezıdentýraǵa 639 grant bólý qarastyrylyp otyr.
«Kadr máselesi de jolǵa qoıylyp keledi. 2023 jyldan beri eseptesek, 176 grant ıgerildi. О́tken jyly 40 dáriger Reseıde, 234 orta býyn medısına mamany Astana qalasynda biliktiligin arttyrdy. Jumys toqtamaıdy. Aýyldarda medısınalyq qyzmettiń qoljetimdiligin arttyrý jalǵasady», deıdi Densaýlyq saqtaý basqarmasynyń basshysy Ashan Baıdýálıev.
Beıindi dárigerlerge tapshylyq 282 bolsa, byltyr 331 jas túlek oblysqa joldanǵan. Onyń ishinde 147 memlekettik medısınalyq uıymdarǵa joldanyp, 31 túlek jumysqa qabyldandy. 9 jas mamanǵa 1,5 mln teńge kóleminde áleýmettik járdemaqy berildi, 6 mamanǵa 8,5 mln teńge kóleminde, 90 mamanǵa 100 AEK mólsherinde kómek kórsetildi, 8 jas mamanǵa turǵyn-úı satyp alýǵa jeńildetilgen nesıe bólindi. Tapshy mamandyqtaǵy dárigerlerdi tartý maqsatynda 2024 jyly jergilikti bıýdjet esebinen 270 mln 987 myń teńgege rezıdentýrada medısınalyq kadrlardy daıarlaýǵa 139 grant bólinip, ol tolyq ıgerildi. Bıylǵy jylǵa 150 grant bólý josparlanǵan.
Densaýlyq saqtaý mınıstrligi 2025 jyldy dárigerler men orta býyn medısına qyzmetkerlerin oqytý jyly dep jarııalady. Osy oraıda bıyl atalǵan maqsatqa 165 mln teńge bólingen. Oblystyq densaýlyq saqtaý basqarmasy aldaǵy máslıhat sessııasynda qarjyny ulǵaıtýdy usynbaq. Oblys kóleminde kórsetilip jatqan medısınalyq qyzmetterge baqylaýdy kúsheıtý, týyndaǵan tótenshe jaǵdaılardy der kezinde sheshý úshin sımýlıasııalyq ortalyq qajet. Basqarma basshylyǵy ol úshin 50 mln teńge qajet ekenin aıtyp otyr.
Aımaqta 30-ǵa jýyq eldi mekende aýyzsýmen qamtamasyz etý máselesi bar. Dárigerler bul másele ishek ınfeksııasynyń taralýyna alyp kelýi múmkin ekenin aıtady. Aıtalyq, búginde oblys kóleminde 12 adam ishek ınfeksııasymen emdelip jatyr eken.
О́ńirde densaýlyq saqtaý salasynda aldaǵy ýaqytta 7 iri jobany iske asyrý baǵytynda jumys júrgizilip jatyr. Medısınalyq qural-jabdyqtarmen qamtamasyz etýge respýblıkalyq bıýdjetten 1,5 mlrd teńge, jalpy sıpattaǵy transfertter esebinen 8,8 mlrd teńge qarjy qarastyryldy.
Túrkistan oblysy
