Foto: parlam.kz
Olardyń basym bóliginiń balalary memlekettik balabaqshanyń tárbıelenýshileri. Balabaqsha men jalpy jumys ýaqyty birdeı. Sondyqtan ata-analar jumystan erterek suranyp, balabaqshaǵa asyǵady. Depýtat Dáýlet Muqaev búgingi Májilistiń jalpy otyrysynda osy máselege jaýapty mınıstrlik nazaryn aýdarýdy surady.
«Qazir kóp otbasylardaǵy ata-analar, ıaǵnı eri de, áıeli de jumys isteıdi. Onsyz Astanada ómir súrý ońaı emes. Jumys ýaqyty – tańǵy saǵat 9-dan keshki 18.00-ge deıin. Bul – barlyq mekemelerge qoıylatyn ortaq talap. Sodan keıin balasyn balabaqshadan alý úshin qyzmetkerler kúndelikti jumystan erte ketýge suranady. Ondaı adamdardan jumys ónimdiligin qalaı talap etýge bolady. Eń qıyny, dál osy ýaqytta elordada jol keptelisi kúsheıip, kólikti tizgindegender balabaqshadaǵy balasyna erterek jetý úshin asyǵys qozǵalady. Sonyń saldarynan jol-kólik oqıǵalary oryn alyp jatatyny taǵy anyq», dedi Dáýlet Muqaev.
Májilismen ata-analar keshki saǵat 18.00-de jumystan shyqsa, balabaqshalar 18.00-ge deıin jumys isteıtin bolsa, onda balalardyń qaraýsyz qalyp, kóp jaǵdaıda qaraýyldyń qasynda qalatynyn da jasyrmady. Halyq qalaýlysy astanalyq ata-analar úshin kúrmeýli bolyp otyrǵan osy máseleni sheshý úshin arnaıy usynysyn ortaǵa saldy.
«Durysy, ata-anasy jumys isteıtin balalardy kezekshi toptarǵa biriktirip, keshki saǵat 19.00-ge deıin qaraıtyn bolsa, durys bolmaı ma? Mundaı tájirıbe Astana qalasyndaǵy keıbir balabaqshalarda bar. Keshki ýaqyttaǵy kezekshi toptardy elordadaǵy barlyq balabaqshada uıymdastyrý kerek dep sanaımyz. Mundaı qadam balasyna alańdaǵan ata-analardyń jumysyn jeńildetetin edi», dedi depýtat.
