Foto: gov.kz
Mınıstrliktiń málimetinshe, elimizde sý basý qaýpi bar 1 223 eldi meken anyqtalyp otyr. Jalpy óńirlerde 1 400 sý tasqynyna qarsy is-shara júzege asyrylǵan. Eldi mekenderdi qorǵaý úshin 576 kılometr qorǵanysh bógetteri salynyp, 164 kılometr drenaj júıesi jóndelgen. 960 avtomobıl jáne temir joldardyń astyna sý ótkizý qurylystary ornatylyp, aýystyrylǵan. 658 kılometr kanal men aryq qazylǵan. 74 ózenniń qaýipti ýchaskesinde úsh júzden astam kılometr tereńdetý men jaǵalaýdy nyǵaıtý, 190 kılometrde tazartý jumystary júrgizilgen.
Eldi mekenderdiń ishinde jańbyr men drenaj júıeleri jóndelip, salynyp jatyr. Sonymen qatar aýyldarda qar shyǵarý úshin qaýipsiz polıgondar aldyn ala anyqtalǵan.
Aqtóbe oblysynyń ákimi Ashat Shaharov óńirdegi sý tasqynyna qarsy is-sharalardyń barysyn tekserdi. TJD komandalyq-shtabtyq mashınasy men ushqyshsyz ushý apparattarynyń kómegimen Ashat Shaharov Elek jáne Qarǵaly ózenderiniń boıyndaǵy yqtımal qaýipti ýchaskelerdi, sondaı-aq Sazdy sý qoımasyn baqylady.
Almaty oblysynyń Talǵar aýdanynda da sý tasqynynyń aldyn alý sharalary júrgizilip jatyr. Daıyndyq aıasynda Qaztýǵan Jyraý kóshesindegi aryq jelileri men arnalar, Topolevka ózeniniń jaǵalaýyn tazartý jáne túbin tereńdetý jumystary júrgizilgen.
Astana sý rettegishi qurylysyna tekserý júrgizildi. Tekserý jumystary barysynda TJD jáne TJ aldyn alý komıtetiniń qyzmetkerleri «Qazsýshar» RMK Aqmola fılıalynyń ókilderimen birlesip, tasqyn sýlardy qabyldaý jáne ótkizý, obektini rekonstrýksııalaýǵa daıyndyq máselelerin zerdelegen.
Jambyl oblysynyń ákimi Erbol Qarashókeev bıyl Baızaq aýdany men Taraz qalasynda sý tasqynynyń aldyn alý, onyń ishinde Talas ózeni jaǵalaýyn nyǵaıtý is-sharalary barysymen tanysty. Tekserý barysynda TJD qyzmetkerleri Baızaq aýdanyndaǵy Sarykemer, Dıhan, Aımantóbe jáne Qostóbe aýyldary arqyly ótetin Talas ózeniniń arnasyn tazalaý jáne nyǵaıtý jumystaryn qajet etetin sý basýy múmkin 6 qaýipti ýchaskeni anyqtady.
Shymkent qalasynyń TJD jergilikti atqarýshy organdar jáne basseındik ınspeksııamen birlesip, sý tasqyny qaýpi bar ýchaskelerdi kózben sholyp tekserý maqsatynda jedel keńes ótkizgen. Tekserý barysynda yqtımal qaýipterge jan-jaqty taldaý jasalǵan.
