Gonkong bilim berý ýnıversıtetiniń prezıdenti, professor Lı Chı Kın Djon Akademııanyń bolashaq yntymaqtastyq úshin platforma bolatynyna senim bildirdi.
«Qazaq ulttyq qyzdar pedagogıkalyq ýnıversıtetimen yntymaqtastyq ornatqanymyzǵa ortaq maqsatqa kúsh biriktirý. Ondaǵy baǵytymyz – muǵalimderdiń kásibı deńgeıin arttyrý, Qazaqstandaǵy bilim berý sapasyn jaqsartý, sondaı-aq Gonkong AAR (Qytaı) men Qazaqstan arasyndaǵy iskerlik baılanysty damytý. Gonkong ýnıversıtetiniń kóp jyldyq tarıhy bar jáne bilim berý salasynda reıtıngi joǵary. Kóshbasshylyq, STEM bilim berý jáne baǵalaý salalarynda tájirıbemiz mol jáne osy baǵyttarda bilimimizben bólisýge, oqytý múmkindikterin usynýǵa, sondaı-aq ýnıversıtettermen birlesken zertteýler júrgizýge daıynbyz. Akademııanyń bolashaq yntymaqtastyq úshin platforma bolatynyna senimdimiz», dep atap ótti ol.
QyzPU rektory Gúlmıra Qanaıdyń aıtýynsha, EdUHK – Qazaqstan bilim akademııasy aıasynda muǵalimderdiń kásibı biliktiligin arttyrý maqsatynda úsh baǵyt boıynsha oqý baǵdarlamalaryn ázirleý josparlanýda. Akademııa aıasynda muǵalimderdiń biliktiligin arttyrýǵa baǵyttalǵan bes oqý baǵdarlamasyn ázirleý josparlanyp otyr. Úsh ýnıversıtet ázirleıtin bul baǵdarlamalar halyqaralyq deńgeıde sertıfıkattalyp, mektep muǵalimderiniń kásibı biliktiligin arttyrýǵa kómektesedi.
«Abai University jasandy ıntellekt jáne ınklıýzıvti bilim berý boıynsha negizgi baǵdarlamalardy ázirleıdi. QyzPU kóshbasshylyq, STEAM-bilim berý jáne baǵalaý máselelerine jaýapty bolady. Qazirgi ýaqytta elimizde 800-den astam «Jaıly mektepter» salynýda. Osy mektepterge mamandar daıarlaý men kóshbasshylyq boıynsha kýrstar ótkizý óte mańyzdy. Kóshbasshylyq baǵyty boıynsha qazirgi jáne bolashaq mektep basshylarynyń daǵdylary men bilimin damytýǵa kóńil bólinedi. Sonymen qatar STEM-bilim berýdi damytý, ásirese qyz balalardy osy baǵyttar boıynsha oqytý – álemdik turaqty damý men genderlik teńdik maqsattarynyń biri. Osyǵan baılanysty biz muǵalimderge arnalǵan STEM baǵytyndaǵy biliktilikti arttyrý kýrstaryn uıymdastyrýdy jáne ýnıversıtetimizdiń stýdentteri men mektep muǵalimderine arnalǵan oqý baǵdarlamalaryn jetildirýdi josparlap otyrmyz. Úshinshi baǵyt – bilimdi baǵalaý júıesin jetildirý, baǵalaý túrlerin synyptyq, ulttyq jáne halyqaralyq deńgeıde damytý. Úsh ýnıversıtet arasyndaǵy bul aýqymdy bastama bolashaqta oń ózgeristerge alyp keletinine senimdimiz. Biz bul baǵdarlamalardy mektep muǵalimderine osy jyldyń kúzine qaraı usynýdy josparlap otyrmyz», dedi rektor óz sózinde.
QyzPU ǵylymı jumys jáne halyqaralyq yntymaqtastyq jónindegi prorektory Zakır Jumaqulov atap ótkendeı, pedagogıkalyq ýnıversıtetterdiń mıssııasy – mekteptegi bilimdi jaqsartý. Mektep júıesin aldyńǵy qatarly bilimmen qamtamasyz etý úshin birlesip ǵylymı zertteýler júrgizý jáne únemi jańa bilimniń shyńynda bolý kerek. Osy sebepti ǵalymdar tańdalǵan baǵyttar boıynsha birlesken zertteýler júrgizetin bolady. Júrgizilgen jumystyń nátıjesi elimizdiń óńirlik joǵary oqý oryndarynyń alıansyn da qamtıtyn bolady. Oǵan pedagogıka boıynsha bilim beretin 6 joǵary oqý orny kiredi.
Akademııalyq almasý men ınnovasııalardy engizýge baǵyttalǵan bul baǵdarlama zaman talabyna saı mamandar daıarlaýǵa úles qosatyn bolady.
