Sýret: gov.kz
Senatorlar áýeli «Qazaqstan alıýmınııi» AQ glınozem alý sehynyń jumys úrdisimen tanysyp, sodan soń «Pavlodar munaı-hımııa zaýyty» JShS basqarý ortalyǵyna bardy. Pavlodar hımııa-mehanıkalyq kolledji men joǵary tústi metallýrgııa kolledjin aralap kórdi.
Oblys ákimdiginde «Eńbek adamy – ulttyq ekonomıkanyń ósýi men ulttyń órkendeýiniń negizi» taqyrybynda ótetin parlamenttik tyńdaýǵa daıyndyqqa, Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýyn iske asyrýǵa arnalǵan Áleýmettik-mádenı damý jáne ǵylym komıtetiniń kóshpeli otyrysy ótti.
Jumysshy mamandyqtar jyly aıasynda Memleket basshysynyń tapsyrmalaryn iske asyrýǵa qatysty máselelerdi talqylaýǵa komıtet músheleri Aınur Arǵynbekova, Talǵat Júnisov, Altynbek Nuhuly, Ásem Rahmetova, Rýslan Rústemov, Amangeldi Tolamısov, jergilikti atqarýshy organdardyń basshylary men kásipodaqtardyń ókilderi qatysty. Is-sharaǵa tóraǵalyq etken komıtet tóraǵasy Nurtóre Júsip negizgi maqsat jumysshylardyń eńbek jaǵdaılaryn zerdeleý, Pavlodar oblysynda tehnıkalyq, orta kásiptik bilim berý júıesinde mamandar daıarlaý ekenin málim etti.
О́ńir ákimi Asaıyn Baıhanov atap ótkendeı, oblysta keshendi is-sharalar jospary túzilgen, ol 3 baǵytty qamtıdy. Eń áýeli kolledjderdi kezeń-kezeńimen jańǵyrtý kózdelip otyr. Buǵan oblystyq bıýdjetten kásiptik-tehnıkalyq bilim berý uıymdaryn jaraqtandyrýǵa, jańǵyrtýǵa shamamen 500 mln teńge baǵyttalady. Áleýmettik áriptestik aıasynda ERG, Kazminerals kásiporyndary 6 kolledjge zamanaýı jabdyqtar satyp alýǵa 500 mln teńge qarajat bóldi. Ekinshi baǵyt – jumys isteıtin jastar qataryndaǵy stýdentter úshin 100 mln teńgege jańa yntalandyrýshy syıaqylar men granttar taǵaıyndaý. Sońǵysy – jumysshy mamandyqtarynyń bedelin arttyrý, kásiporyn qyzmetkerlerin yntalandyrý.
Aımaqta ekonomıkalyq belsendi dep sanalatyn 405 myń adam bar bolsa, onyń 60%-dan astamyn jumysshy mamandyqtar ókilderi ıelenedi. Taldaý kórsetkendeı, keleshekte jumys kúshine degen qajettilik arta túsedi. Aldaǵy 5 jylda oblysta 140-tan astam ınvestısııalyq jobany iske asyrý josparlanǵan. Onyń ishinde úsh ferroqorytpa zaýytyn ashý, ustalyq-bandaj keshenin iske qosý, iri elektrometallýrgııalyq zaýyttyń qurylysy, quramynda altyny bar konsentrattardy qaıta óńdeý kásipornyn iske qosý kózdelip otyr. Nátıjesinde, 11 myńnan asa turaqty jumys orny qurylady.
– Slesarlar, montajdaýshylar, elektrıkter, qurylysshylar, júrgizýshiler, mehanıkter sııaqty jumysshy mamandyqtar – qurylystan bastap óndiriske deıingi ekonomıkanyń kóptegen salalaryna qajet. Olardyń jumystary mańyzdy bolǵanyna qaramastan, nazarǵa jıi ilinbeı qalady. Mansaptyq ósý keleshegi men laıyqty jalaqy týraly aqparattardy jetkizý arqyly jumysshy mamandyqtardyń mártebesin arttyrýǵa múmkindik bar, – dedi A.Baıhanov.
Osy maqsatta qala quraýshy kásiporyndardyń basshylarymen birqatar kezdesý ótkizildi. Olar óz kezeginde qyzmetkerlerdi materıaldyq, áleýmettik qamtamasyz etý jónindegi bastamalarǵa qoldaý bildirdi. Olar – turǵyn úımen qamtamasyz etý, avtokólik satyp áperý, jalaqyny ósirý, basqa da áleýmettik yntalandyrý. Máselen, ERG toby osy maqsattarǵa 1,5 mlrd teńge bólýdi josparlap otyr. Buǵan qosa, bıylǵy jyly óńir kásiporyndarynda jalaqyny arttyrý boljamy bar.
Senattyń Áleýmettik-mádenı damý jáne ǵylym komıtetiniń tóraǵasy N.Júsip kezdesý barysynda aıtylǵan barlyq usynystar aldaǵy ýaqytta eskeriletinin atap ótti.
Pavlodar oblysy
