Al keıingi urpaqqa Myrzeken Qusymjanovtyń sonaý 1932 jyly 5 aqpanda Abaı (burynǵy Semeı) oblysynyń Abraly aýdanynda dúnıege kelgenin jáne osy óńirden shyqqan tuńǵysh kásibı dáriger ekendigin, aýdanda alǵashqy aýrýhanany salǵyzýǵa muryndyq bolyp, jergilikti halyqqa jan-jaqty medısınalyq kómek kórsetip, hırýrgııalyq kúrdeli operasııalar ǵana emes, akýsherlik qyzmetke deıin jasaǵanyn aıtýǵa bolady.
Jas ta bolsa alǵyr, óz isine myǵym, talantty jas mamannyń jurttyń arasynda jaqsy aty tez taraıdy. Densaýlyq saqtaý salasynda erekshe uıymdastyrýshylyq qabiletimen, adaldyǵy, týrashyldyǵymen kózge túsken dáriger Dinmuhamet Qonaevtyń pármenimen 1983 jyldan 1996 jylǵa deıin QR Áleýmettik qorǵaý mınıstriniń orynbasary qyzmetin atqarady. Memlekettik deńgeıdegi asa jaýapty qyzmetter júktelgen Myrzeken Qusymjanov halyqty áleýmettik qamsyzdandyrý organdarynyń qyzmetin qaıta qurý men nyǵaıtýǵa, zeınetaqy reformasyn júrgizýge eleýli úles qosady.
Kórnekti memleket qaıratkeriniń atyn máńgilik etýdi murat tutqan memorıaldyq taqtanyń ashylýynda professor Asqarbek Qusaıynov, professor Qadyr Omarov, professor Keńes Úshbaev, professor Bolatbek Násenov, professor Maqqam Tólenov, medısına ǵylymdarynyń doktory, burynǵy Densaýlyq saqtaý mınıstri Vasılıı Devıatko, professor Zulqaıyr Mansurov, UǴA akademıgi Vıacheslav Lokshın júrek tebirenterlik estelikterimen bólisti.
Myrzeken Qusymjanovtyń aıaýly jary, ul-qyzdarynyń anasy Shámshııa Kanbaeva densaýlyǵyna baılanysty esteligin LED ekran arqyly joldady.
«Qazaq tarıhyndaǵy kıeli ólke – Semeı óńirinde eńbek jolyn bastaý Myrzeken úshin úlken jaýapkershilik edi. Abaıdaı dana, Shákárimdeı ustaz, Muhtardaı tulǵalar týǵan jerde qyzmet etken Myrzeken baqytty dep aıtar edim.
Qıyn kezderde atap aıtqanda, (Semeı) ıadrolyq polıgon aımaǵynda kezinde dáriger atymen bolmady deýge bolady, bir ǵana dáriger bolsa, ol da Myrzeken barǵannan keıin ketip qaldy. О́zi aýrýhananyń bas dárigeri, ózi hırýrg, ózi akýsher-gınekolog, ózi pedıatr, bylaısha aıtqanda ámbebap dáriger boldy. Bir ózi birneshe qyzmetti qatar alyp júrdi, sebebi maman tapshy, jumys kóp, aýdan turǵyndaryna medısınalyq qyzmetti jalǵyz ózi kórsetti. Sol kezde aýdanda bir ǵana aýrýhana boldy. Eski perzenthana da sol, týberkýlezben aýyratyndar da sonda emdeldi. Aýdandar men oblystardyń densaýlyq saqtaýdy uıymdastyrý júıesine túbegeıli ózgerister engizdi, bul halyqtyń densaýlyq jaǵdaıyn edáýir jaqsartýǵa, ana men bala ólimin azaıtýǵa, keıbir juqpaly aýrýlardy joıýǵa múmkindik berdi.
Aýdan ortalyǵynan úlken aýrýhananyń ashylýyna eń birinshi yqpal etken de Myrzeken boldy. Áıelder bosanatyn perzenthana, jergilikti turǵyndar úshin emhana salynyp, negizin qalaǵan da Myrzeken edi. Perzenthana men emhananyń kadrlik qyzmetiniń úzilissiz jumys isteýi úshin burynǵy Semeı medısınalyq ınstıtýtynyń rektorymen kelisimder jasap, jas mamandardy jumyspen qamtyp, olarǵa jaǵdaı jasady. Eldi mekenderden dárigerlik pýnktter ashty. Operasııa jasalýy kerek háli múshkil naýqastardy aýdan ortalyǵyna ákelý úshin kólik máselesin de sheship otyrdy. Máselen, ol kezderde jedel járdem kóligi múlde bolǵan joq, naýqastardy at arbamen aýrýhanalarǵa ákelip, operasııa jasap, qanshama adamǵa ómir syılady.
Sol zamanda svet joq, kerosınmen jaqqan shamnyń jaryǵymen operasııalar da jasaǵan kúnderi boldy. Jalpy kez kelgen qıyn sátterde de Myrzeken jol taba bildi. Sóıtip júrip 30 jasynda «Qazaqstanǵa eńbegi sińgen dáriger» ataǵy berildi, sodan Myrzekenniń laýazymyn joǵarylatyp, Semeıdiń, Aıakózdiń aýrýhanalaryn, halyqtyń densaýlyǵyn saqtaý isine, elimizdiń ǵylymy men medısınalyq bilimin damytýǵa úshin mınıstrdiń orynbasary qyzmetine jiberildi. 1983 jyldan 1996 jylǵa deıin QR Áleýmettik qorǵaý mınıstriniń orynbasary qyzmetin atqardy.
Myrzekenniń eńbegin eskerip, eskertkish taqta ornatyp jatqandaryń úshin Almaty qalasynyń ákimdigine erekshe alǵys aıtamyn! Bundaı ónegeli is óskeleń urpaǵy úshin úlken tárbıe dep bilemin», dedi Shámshııa Nyǵmetqyzy.
Memorıaldyq taqtanyń ashylý saltanatynyń sońynda otandyq medısınanyń maıtalmandary – «Akademık B.Jarbosynov atyndaǵy ýrologııa ǵylymı ortalyǵy» AQ professory, joǵary sanattaǵy hırýrg-ýrolog, «Altyn qandaýyr» syılyǵynyń laýreaty Súnııat Myrzekenuly Qusymjanov pen QR Prezıdenti Is basqarmasy medısınalyq ortalyǵy Ulttyq gospıtaliniń vıse-prezıdenti Janara Myrzekenqyzy Qusymjanova ákeleriniń kózin kórgen – jınalǵan qaýymǵa shynaıy alǵystaryn bildirdi.
(Fotoda M. Qusymjanovtyń balasy)
ALMATY
