Elimizde 2024 jyly qabyldanǵan «Áıelderdiń quqyqtaryn qorǵaý jáne balalardyń qaýipsizdigin qamtamasyz etý týraly» zańyna sáıkes, 16 jasqa tolmaǵan balalardy avtobýstan, trolleıbýstan nemese basqa da qoǵamdyq kólik túrlerinen májbúrlep túsirýge tyıym salyndy. Bul ózgeris – elimizdegi bala quqyqtaryn qorǵaýdy kúsheıtýge baǵyttalǵan mańyzdy qadamnyń biri. Buǵan deıin keıbir jaǵdaıda qoǵamdyq kólik kondýktorlary nemese júrgizýshiler jolaqysy tólenbegeni úshin balalardy aıaldamadan túsirip ketetin. Mundaı áreketter balanyń qaýipsizdigine qater tóndirýmen qatar, olardyń psıhologııalyq jaǵdaıyna da keri áser etedi. Jańa zań boıynsha, qoǵamdyq kólik qyzmetkerleri balaǵa qatysty osyndaı áreket jasasa, zań aldynda jaýapqa tartylady. Bul ereje balalardyń ómirine tónetin qaýiptiń aldyn alýǵa baǵyttalǵan. О́ıtkeni kámeletke tolmaǵan balanyń qaraýsyz qalyp, jolda júrýi nemese beıtanys jerde jalǵyz qalýy qaıǵyly oqıǵaǵa alyp kelýi múmkin.
Eger siz osyndaı jaǵdaıǵa kýá bolsańyz, dereý «102» nómirine polısııaǵa nemese «111» senim telefonyna habarlasyńyz. Bul zań tek qoǵamdyq kólikke qatysty emes, jalpy balanyń kez kelgen qoǵamdyq ortada qorǵalýyn qamtamasyz etedi. Ata-analar men balanyń zańdy ókilderi bul ózgeristerdi bilip qana qoımaı, balalaryna óz quqyqtary týraly aqparat berip otyrýy qajet. Kez kelgen bala óziniń zańdy quqyqtaryn bilýi jáne qandaı da bir ádiletsizdikke tap bolǵan jaǵdaıda jaýapkershilikke tartýǵa bolatynyn túsinýi kerek.
