Sýret: irbistv.kz
Sáýlet salasynyń mamany Nazar Jumabekov oblys ortalyǵyndaǵy ǵımarattarda birkelki sáýlet úlgisi saqtalmaı otyrǵanyna qynjylady. Onyń pikirinshe, shaharda kórikti nysandar jetkilikti, sonyń ishinde búkil elimizge tanymal Máshhúr Júsip meshiti men Blagoveshenskıı sobory bar.
Elimizde biryńǵaı sáýlettik kelbet uǵymyn engizýdiń tájirıbesi bar. Almatyda 2023 jyly dızaın-kod dep atalatyn qujat qabyldandy. Mamandardyń oıynsha, usaq-túıek máseleler túgeldeı qamtylǵan mundaı qujatty barlyq qalalarda qabyldaýǵa bolady.
– Sáýlet qaıdaǵy bir jeke ustanym, kózqarastardan bastaý almaýǵa tıis. Dızaın-kod – qujat. Bas tartylǵan sheshimderdiń barlyǵyn kásipkerler palatasy, prokýratýra, taǵysyn-taǵylar tekseredi. Dızaın-kodta barlyǵy jazylady: tóseletin kespe tastar, jol jabynynan bastap qasbettiń túsi men óńi, qaptama materıaldary, mańdaıshalar, kógaldandyrý, shaǵyn pishinder de bar, – deıdi N.Jumabekov.
Pavlodar bıligi dızaın-kod týraly 2022 jyly oılaı bastaǵan edi. Memlekettik satyp alýlar portalynda qujatty ázirleýge qatysty lot paıda boldy. Biraq konkýrs ótkizilmedi.
– Qazirde qalanyń dızaın-kody bar, alaıda ol qandaı da bir quqyqtyq qujatpen bekitilmegen. Biz ony basshylyqqa ala almaımyz, sebebi zań júzinde bekitilmegen soń belgili bir is-sharalar qabyldaýǵa quqymyz joq. Qoldanystaǵy zańnama múmkindigimizdi shekteıdi. Astana men Almaty aıryqsha qala mártebesine ıe bolǵandyqtan, olar zańnama aıasynda áreket etip otyr, – dep túsindirdi Pavlodar qalasynyń sáýlet jáne qala qurylysy bóliminiń bas mamany Tımýr Seıitqalıev.
Byltyr qaladaǵy ortalyq kóshelerdiń birin qaıta jańartýǵa sheshim qabyldandy. Lermontov kóshesiniń jańa kelbetin Almaty ýrbanısteri usyndy. Munda avtobýstar men velosıpedshilerge arnalǵan jol, jaıaý júrginshiler joldarynda demalys aımaqtary, sýburqaqtar qarastyryldy. Jalpy, shahardaǵy kóshelerdiń syrtqy kelbetin tutastaı ózgertý múmkin emes. Kásipkerlik nysandardaǵy jarnamalyq túrli mańdaıshalar, bannerler, tústi palıtralar báribir ózgerissiz qalyp otyr.
2023 jyly Almatynyń ataýly qujaty bekitilip, keıin shahardaǵy dızaın-kodqa sáıkes kelmeıtin mańdaıshalar men bannerler alyndy. Byltyr jazda Astana qalasynyń dızaın-kody ázirlendi. Pavlodarlyq sáýletshiler mundaı qujat árbir aımaqta, kemi oblys ortalyǵynda bolýy kerek dep esepteıdi.
Pavlodar oblysy
