Sýretti túsirgen – Erlan OMAR, «EQ»
Temirjol salasynyń ınfraqurylymyn jaqsartýǵa keıingi jyldary memleket tarapynan tıimdi jaǵdaı jasalyp jatyr. «QTJ» basqarma tóraǵasy Nurlan Saýranbaev ekonomıkalyq ahýaldy ulǵaıtý maqsatynda 185 lokomotıv jáne 143 jolaýshylar vagony satyp alynǵanyn habarlady. Aldaǵy úsh jylda jolaýshylar vagondary tolyǵymen jańartylyp, jasaqtalmaq. 2025 jyldyń II toqsanynda «Shtadler Qazaqstan» zaýytynda jolaýshylar vagondarynyń óndirisi iske qosylady. Úkimet 2029 jylǵa qaraı 1 200-ge jýyq jolaýshylar vagonyn satyp alýdy kózdep otyr. Nátıjeli bolǵan jaǵdaıda vagondardyń tozý deńgeıi 38%-ǵa deıin tómendeıdi.
Ulttyq kompanııa qazir úsh iri ınfraqurylymdyq jobany júzege asyrýdy bastap ketti. 5 myń shaqyrymnan astam temir jol toraby 2030 jylǵa deıin salynyp, 11 myń shaqyrym shoıyn jol jóndeledi dep josparlanǵan. «Dostyq–Moıynty» temirjol jelisiniń jobasy Qytaı men Eýropa arasyndaǵy tranzıttik tasymal múmkindigin jedeldetýge baǵyttalǵan. Uzyndyǵy 836 shaqyrymdy quraıtyn «Dostyq–Moıynty» ýchaskesinde ekinshi joldardyń qurylysy júrip jatyr. Jer tósemin nyǵaıtý jumystary 99 %-ǵa aıaqtalǵan. 92 kópirdiń 78-i salyndy. 550 shaqyrymǵa jýyq jolǵa jańa rels pen shpal torlary tóselgen. Aldaǵy ýaqytta «Moıynty–Balqash» jáne «Beskól–Dostyq» baǵyttarynda ýaqytsha poıyz qatynaıdy degen jospar da qarastyrylǵan.
«Dostyq–Moıynty» temirjol ýchaskesine ekinshi jol salý jumysy júrgizilip jatyr. Soǵan qaramastan kórshiles qytaı eline jospar boıynsha tasymaldaý belgilengen merzimnen buryn nátıjeli oryndaldy. 2023 jylmen salystyrǵanda ósim 12%-ǵa artty», deıdi «QTJ» UQ «Integrasııalanǵan josparlaý dıreksııasy» fılıaly dırektorynyń orynbasary Álibı Tólegenov.
Almaty stansasyn aınalyp ótetin aınalma temirjol tarmaǵynyń qurylysy josparǵa saı júzege asyp jatyr. 75 shaqyrymdy quraıtyn jańa jeliniń uzyndyǵy «Qazybek-bek» jáne «Jetigen» stansalaryn baılanystyrady. Qurylys jumystaryn júrgizý barysynda 125 shaqyrym jol tóselgen.
«Jetigen» stansasynyń bazasynda 40 shaqyrym rels-shpal toryn tóseýge daıyndyq júrgizildi. Bul jobanyń mańyzdylyǵy aınalma temirjol jelisi Almaty stansasyn aınalyp ótip, júk aǵynyn «Jetigen–Qazybek bek» jańa temirjolyna qaıta baǵyttaýǵa múmkindik beredi. Nátıjesinde, Almaty torabyna túsetin júkteme 40% azaıýǵa tıis. Sondaı-aq dittegen jerge júk qysqa merzimde jetkizilmek.
«Joba bekitilgen kestege sáıkes oryndalyp jatyr. Jetigen stansasynyń bazasynda kólemi 4,8 mln tekshe metrden astam qazba jáne basqa da jumystar júrgizildi. 32 sý ótkizgish qubyr jáne 3 kópir ornatyldy. Qurylys jumystary 2025–2026 jyldary aıaqtalyp, qoldanysqa beriledi», deıdi Kólik mınıstrligi Temirjol jáne sý kóligi komıteti tóraǵasynyń orynbasary Nurjan Kelbýǵanov.
О́zbekstanmen aradaǵy saıası-ekonomıkalyq baılanysty nyǵaıtýǵa negizdelgen «Darbaza–Maqtaaral» temirjol qurylysy – mańyzdy jobalardyń biri. Jańa temirjol jelisiniń qurylysy júk tasymalyn qazirgi Saryaǵash–Tashkent ýchaskesinen jańa jelige aýystyrýǵa, sondaı-aq «Saryaǵash» stansasynyń jumysyn edáýir jeńildetedi dep josparlanǵan. О́ńirlik ınfraqurylymdy damytý maqsatynda atalǵan joba aldaǵy ýaqytta О́zbekstanǵa eksport kólemin arttyrýǵa múmkindik bermek.
203 shaqyrym joldyń 100 shaqyrymyna rels-shpaldy tór tóselip, qazir 9,5 mln tekshe metr qazý jumystarynyń 15%-y oryndaldy. Qurylysqa qajetti materıaldar jergilikti óndirýshilerden jetkiziledi. 70-ten astam jumysshy, 46 jol-qurylys tehnıkasy jumyldyrylǵan ınfraqurylymdyq joba 2027 jyly aıaqtalady. Qurylys kezeńinde 3 400 ýaqytsha jumys orny, qoldanysqa berilgen ýaqytta 500-den astam turaqty jumys orny qurylmaq.
