Foto: dasco.kz
D.Sádýaqasovtyń aıtýynsha, QQS mólsherlemesin 16%-ǵa deıin kótergen durys. Birden 20%-ǵa deıin kóterý týraly bastapqy ıdeıa ekonomıkalyq daǵdarysqa ákelýi múmkin.
«Mundaı kúrt ósim kóleńkeli ekonomıkanyń ulǵaıýyna, bıznestiń qolma-qol aqshaǵa kóshýine jáne jalpy salyqtyq túsimderdiń tómendeýine sebep bolýy yqtımal. Sondyqtan QQS mólsherlemesin birtindep kóterý – eń ońtaıly sheshim.
Ekonomıkanyń bul ózgeriske qalaı jaýap beretinin birneshe jyl baqylaý qajet. Sodan keıin ǵana salyq mólsherlemesin odan ári kóterý týraly sheshim qabyldaýǵa bolady», dedi ol.
Onyń pikirinshe, úsh deńgeıli salyq júıesi (16%, 10%, 0%) jáne keıbir salalardy salyqtan bosatý – qoldanýǵa bolatyn model. Degenmen, bul júıeniń tıimdiligi jeńildikterge qaı salalardyń enetinine baılanysty bolmaq.
«Qazir kóptegen salyq jeńildikteri alynyp tastaldy, biraq onyń ornyna jańa túrleri engizilip jatyr. Mundaı saralanǵan salyq júıesi Memlekettik kirister komıtetiniń jumysyn qıyndatýy múmkin, sebebi salyqtyq esep júrgizýdi kúrdelene túsedi. Alaıda úsh túrli mólsherlemeni basqarýǵa bolady. Tipti keıbir baǵyttarǵa 5% mólsherlemesin qosý da oryndy bolar edi. 0% jáne 10% mólsherlemesi qandaı salalarǵa beriletini mańyzdy bolyp otyr. Aýyl sharýashylyǵy men tamaq ónerkásibi mindetti túrde osy jeńildetilgen salyq júıesine kirýi tıis. Sondaı-aq farmasevtıka, mektep oqýlyqtary jáne jeńil ónerkásip salalaryn qarastyrý qajet. Kreatıvti ındýstrııa, kıno jáne IT salalary da nazardan tys qalmaýy tıis. Sońǵysy Astana Hub aıasynda salyqtyq jeńildikter alyp úlgerdi. Jalpy alǵanda, bul tásilmen kelisemin», dedi sarapshy.
Buǵan qosa ol QQS mólsherlemesiniń ósýi ınflıasııaǵa qalaı áser etetinine de toqtaldy. Onyń aıtýynsha, QQS mólsherlemesin arttyrý ınflıasııaǵa qysqa merzimdi áser etýi múmkin, biraq bul ýaqytsha jaǵdaı.
«Iá, ınflıasııa ósedi. Vıse-mınıstr S.Jumanǵarın 3% deńgeıinde bolýy múmkin ekenin aıtty, bul – shynaıy boljam. Biraq salyq reformasynan týyndaıtyn baǵanyń ósýi uzaqqa sozylmaıdy. Inflıasııaǵa syrtqy faktorlar kóbirek áser etedi. Mysaly, rýbldiń, munaı baǵasynyń nemese makroekonomıkalyq jaǵdaıdyń ózgerýi. Eger teńge qunsyzdansa, ımporttyq taýarlar qymbattap, ınflıasııa ósedi. Biraq bul faktorlar salyq saıasatyna tikeleı baılanysty emes», dedi D.Sádýaqasov.
Sondaı-aq, sarapshy QQS mólsherlemesiniń ósýi halyqqa qalaı áser etetini týraly da aıtty.
«Eger tamaq ónerkásibi úshin QQS mólsherlemesi 0% bolsa, onda azyq-túlik baǵasyna oń áser etedi. Biraq eldegi jalpy ekonomıkalyq jaǵdaıdy makroekonomıkalyq úderister anyqtaıdy. Elimizdiń ekonomıkasy shıkizattyq sektorǵa, ásirese munaı baǵasyna táýeldi. Qazirgi ýaqytta kúlli álem AQSh-taǵy jaǵdaıdy baqylap otyr. Máselen, Donald Tramptyń bastamalary naryqta aıtarlyqtaı ózgeristerge ákelýi múmkin. Negizgi ekonomıkalyq ózgeristerdi bıylǵy ekinshi jáne úshinshi toqsanynda kóremiz», dep túıindedi sarapshy Dármen Sádýaqasov.
