Dánekerleýshi – sheberlikti, tózimdilikti qajet etetin kúrdeli jumys. Qosylatyn temirlerdiń qattylyǵyna, beriktigine qaraı elektrodtyń túrleri, tigistiń qalyńdyǵy men beriktigi de aýysyp otyrady. Dánekerleýshi sonyń bárin saralaı bilýi kerek. Qubyrdyń ishine kirip, etbetinen jatyp, dánekerlegen kezde gazdyń kúshtiliginen adam tunshyǵyp qala jazdaıdy. Sondyqtan dánekerleýshi jıi-jıi dalaǵa shyǵyp, tynystap otyrady.
Kezinde dánekerleýshilerge ókpedegi gazdyń ýytyn alýǵa tegin sút beretin. Sonymen birge zeınet demalysyna da basqalardan 5 jyl buryn shyǵaratyn. Bul – dánekerleýshiniń aýyr eńbegin baǵalaǵandyq.
Dánekerleýshilerdiń ishindegi eń kúrdelisi – gazelektr dánekermen jumys isteýshiler. Bul – dánekerleýshiler kásibiniń joǵary satysy. Oǵan arnaıy oqý men daıyndyqtan ótkender ǵana qabyldanady. Mundaǵy jarqyl men gazdyń ýyty qarapaıym dánekerleýden áldeqaıda joǵary.
Vladımır Grıgorevıch mamandyǵyn búge-shigesine deıin ıgerip, sheberlik shyńyna jetken, eń joǵarǵy – 6-razrıadty jumysshy. Bir kezde joǵary bilim almaq bolyp, ınstıtýtta da oqyǵan eken. Alaıda ınjenerlerdiń tabysy az ekenin eskerip, osy, jumysshy mamandyǵyna óz qalaýymen aýysypty.
«Osy jumysty qalaǵanyma esh ókinbeımin. Tabysym óte jaqsy. Bizdiń sehta joǵary sheberlikti talap etetin dánekerleý isi meniń qolymnan ǵana keledi. Ásirese jylytý qubyrlaryn dánekerleý úlken jaýapkershilikti talap etedi. Qubyrlardyń dánekeri durys bolmasa aırylyp ketip, qanshama adam saqyldaǵan sary aıazda jylýsyz qalýy múmkin. Ázirge meniń dánekerlegen qubyrlarymnyń aırylǵany bolǵan emes. Sony maqtan etemin», deıdi ol.
О́z basyńyzǵa qaýip tónip, jumystan zııan shekken kúnderińiz boldy ma degen suraqqa V.Belobrovenko oılanyp jaýap berdi: «Qaýipsizdik erejesin saqtaý ózińe ǵana baılanysty emes. Keıde bıiktikte dánekerleý jumysyn júrgizgende qosalqy jumyskerler asyǵystyq jasap, basyp shyǵatyn aǵash sórelerdi durys bekitpeıdi. Sondaılardyń kesirinen súrinip, qulap ketýiń múmkin. Sondyqtan bıikke shyǵarda baspaldaqtardy muqııat tekseremin. О́ıtpeseń bolmaıdy».
Kásibı maman jumystan bos ýaqytynda kórkem dánekerleýmen de aınalysady. Temir bólshekterinen, qatty qańyltyrlardan túrli fıgýralar, gúlder, ertegi keıipkerlerin jasaıdy. «Bos ýaqytymda osyndaı buıymdar jasaýǵa ábden daǵdylanyp kettim. Jasaǵan dúnıelerim halyqqa, ásirese balalarǵa unap, qýana qarap, tamashalap jatady», deıdi ol.
Bul kúnde V.Belobrovenko óz isiniń mamany ǵana emes, sonymen qatar shyǵarmashyl adam retinde de tanymal. Onyń eńbekqorlyǵy, sheberligi, mamandyǵyna adaldyǵy áriptesterin de qanattandyryp, oǵan elikteýshiler, úlgisin alýǵa umtylýshylar qatary kóbeıip keledi.
PETROPAVL
