Áýlıeatalyq delegasııany bastap barǵan Taraz qalasy ákiminiń orynbasary Gúldana Jaýynbekova sheteldik áriptesteriniń qurmeti bólek ekenin aıtty.
«Halyqaralyq kórmeniń 25 jyldyǵyna oraı uıymdastyrylǵan is-sharaǵa Orta Azııa, Ońtústik Azııa elderi jáne Dúnıejúzilik qolónershiler tizimine engen qalalardyń qolónershileri qatysty. Solardyń arasynda Qazaqstannyń ulttyq qolóneri erekshe baǵaǵa ıe ekenin ańǵardyq. Árıne, bul memleketimizdiń jan-jaqty qoldaýynyń nátıjesi ekeni daýsyz. Tórt kúnge sozylǵan halyqaralyq shara aıasynda bizdiń sheberler óz týyndylaryn kópshilik nazaryna usynyp qana qoımaı, tól mádenıetimizdiń damýyna da zor úles qosty», deıdi Taraz qalasy ákiminiń orynbasary.
Halyqaralyq deńgeıde uıymdastyrylǵan is-sharaǵa arnaıy qatysqan tarazdyq Anar Beksultanovanyń aıtýynsha, belgili mamandardan bólek, jergilikti halyq ta týyndylardy joǵary baǵalap, qyzyǵýshylyq tanytqan.
«Biz qolónershilerdiń dúnıejúzilik tizimine ulttyq kıimder arqyly engenbiz. Sondyqtan osy kórmege óz tarapymyzdan tórge iletin túskıiz, syrmaq, ulttyq kıimderimiz – shapan, jadaǵaı, kıizden jasalǵan aıaq kıim, bas kıim, sómke túrlerin apardyq. Barlyǵy derlik sarapshylardyń qyzyǵýshylyǵyn týǵyzdy», deıdi ol aǵynan jarylyp.
