Foto: primeminister.kz
Jańa ákimdi oblys aktıvine Úkimet basshysy Oljas Bektenov tanystyrdy.
Oljas Bektenov buǵan deıin aımaq basshysy laýazymyn atqarǵan Ermek Kósherbaevqa nátıjeli jumysy men óńirdiń damýyna qosqan úlesi úshin alǵys bildirdi.
Premer-mınıstr Memleket basshysynyń Shyǵys Qazaqstan oblysy basshylyǵynyń aldyna qoıǵan mindetterine toqtaldy. Jıynda halyqty jumyspen qamtamasyz etip, óńir ekonomıkasynyń damýyna serpin beretin perspektıvaly baǵyttar da aıqyndaldy. Basym jobalar qatarynda shaǵyn jáne orta bıznesti qoldaý, aýyl sharýashylyǵy ónimderin qaıta óńdeý, sıfrlyq sheshimderdi engizý josparlary bar. Halyqty sapaly aýyz sýmen qamtamasyz etý, ınjenerlik ınfraqurylymdy jańǵyrtý jumystaryn kúsheıtýdiń mańyzdylyǵy da atap ótildi.
«Tabıǵı demalys aımaqtary men tarıhı-mádenı oryndardy damytý arqyly týrıstik áleýetti ashýǵa erekshe nazar aýdarylýy tıis. Buqtyrma sý qoımasy arqyly elimizdegi eń iri kópirdiń ashylýy, Qatonqaraǵaı jáne Zaısan kýrorttyq aımaqtarynda áýejaılardyń salynýy sala men jalpy ekonomıkanyń damýyna qosymsha serpin beredi. Basym mindetter qatarynda arnaıy ekonomıkalyq jáne ındýstrııalyq aımaqtardy ınjenerlik ınfraqurylymmen qamtamasyz ete otyryp, ınvestorlar úshin qolaıly jaǵdaı jasaý, ónerkásipte zamanaýı tehnologııalar men ınnovasııalyq tásilder qoldaný jáne basqa da máseleler belgilengen», dedi Oljas Bektenov.
