Jumabek Táshenev atyndaǵy ýnıversıtettiń áleýmettik-mádenı damý jónindegi prorektory Ǵalymjan Bıtursyn vedomstvo basshysynyń atalǵan oqý ordasyna at basyn buryp, bolashaq mamandarmen tildesip, jaqynyraq tanysýy stýdentterge jyly áser qaldyrǵanyn aıtty.
«Ásirese stýdentter mınıstrge jasandy ıntellekt ortalyǵy men zerthanalarda óz bilimderin tájirıbe júzinde kórsetip, ıdeıalaryn aǵylshyn tilinde túsindirip, kelgen qonaqpen erkin pikir almasty. Bul robottehnıka zerthanasy stýdentterdiń jumys isteýine qolaıly etip jabdyqtalǵan. Zerthana 3D-prınter, 3D-kózildirik, lazerlik stanokt, robot, jarys alańdarymen tolyq qamtylǵan. Sonymen birge zerthananyń bir ereksheligi – munda stýdentterge óz jobalaryn ázirlep, tájirıbede synap kórýge bar múmkindik qarastyrylǵan. Bul bolashaq mamandardyń erteńgi kúni naqty ónerkásiptik jobalarǵa qatysýyna tikeleı jol ashady. Zamanaýı ıdeıa almasý alańynda stýdenttermen kezdesken sala mınıstri jasalyp jatqan qurylǵylardy qoldanysqa keńinen engizilý kerektigin aıtty. Sondaı-aq ozyq ıdeıalardy joǵary oqý oryndary qaýymdastyǵy men belsendi jastar ózara únemi bólisip otyrý qajettigin eske saldy. Osy oraıda bizdiń oqý orny árdaıym memleket belgilegen basty maqsat – sapaly da bilikti mamandar daıarlaý isin jalǵastyra beredi», dedi Ǵ. Bıtursyn.
Sonymen qatar mınıstr S.Nurbek ýnıversıtettiń táýlik boıy jumys isteıtin kovorkıng ortalyǵynda bolyp, zamanaýı bilim berý men sandyq júıege beıimdelgen kitaphanany aralady. Munda da sabaqqa daıyndalyp jatqan jastarmen áńgimelesti. Kezdesý barysynda vedomstvo basshysy ozyq tehnologııalarmen jabdyqtalǵan kitaphanalar elimizge qajet ekenin, bilim alýshylarǵa ıgilikterdiń bári barynsha qoljetimdi bolý kerektigin, al onyń jarqyn bir úlgisin alyp tulǵa esimin ıelengen ýnıversıtetten baıqaǵanyn jetkizdi.
Odan keıin Ǵylym jáne joǵary bilim mınıstri ýnıversıtet bazasyndaǵy zamanaýı standarttarǵa tolyq sáıkes keletin, 200 orynǵa eseptelip jabdyqtalǵan Ulttyq biryńǵaı testileýdi (UBT) ótkizýge arnalǵan respýblıkalyq testileý ortalyǵyna at basyn burdy. S. Nurbek óz sózinde bıylǵy 13 qańtar men 10 aqpany aralyǵynda kúnine 180-200 talapker eki lek boıynsha synaq tapsyrýshylardy qabyldap jatqan testileý ortalyǵynyń qyzmetine oń baǵasyn berdi.
J. Táshenev ýnıversıtetiniń prorektory Ǵ.Bıtursynnyń aıtýynsha, zamanaýı barlyq ıgilikter bilim alýshylardyń yńǵaıyna qaraı baǵyttalyp jasalǵan. Osy oraıda, byltyr qoldanysqa berilgen kórnekti jazýshy Marhabat Baıǵut atyndaǵy stýdentter ortalyǵyn aıtýǵa bolady. Bul ortalyqta ýnıversıtettiń belsendi jastary jıi bas qosyp, ozyq ıdeıalaryn ortaǵa salyp, túrli taqyrypta áńgime-dúken qurady. Qysqasy, qazaqqa tanymal qalamger Marhabat Baıǵut esimin ıelengen bul ortalyq jastardyń pikir almasyp, ıdeıalary toǵysatyn alańǵa aınalyp otyr.
