«Shyǵys» óńirlik qolbasshylyǵyna qarasty 6679 áskerı bóliminiń áskerı qyzmetshileri maıdanger Marııa Matıýshına turatyn úı aýlasynda orkestrmen konsert qoıdy. Soǵys jyldary aıtylǵan áýezdi ánderdi shyrqap, erlikti sıpattaıtyn orkestrlik shyǵarmalardy oryndady. Qarııa ulandyqtardyń ónerine rızashylyǵyn bildirip, batasyn berdi.
«Bizdiń búgingi basty mindetimiz ári paryzymyz – soǵys ardagerleriniń árqaısysyna qamqorlyq kórsetý, olardyń erlikterine sheksiz alǵysymyzdy bildirý. Sondyqtan áskerı bólim orkestri de qarııanyń kóńilin aýlap, boıyn sergitý maqsatynda soǵys jyldaryndaǵy áýezdi ánderden popýrrı oryndady. Biz soǵys ardagerleriniń úılerine baryp, jaǵdaıyn surap turamyz», deıdi 6679 áskerı bólimi komandıriniń tárbıe jáne áleýmettik-quqyqtyq jumystar jónindegi orynbasary maıor Nazbek Málikov.
Marııa Alekseevna 1926 jyly 19 qańtarda jumysshy otbasynda dúnıege kelgen. 1942 jyly on alty jastaǵy boıjetken Novomoskovsk qalasyna tájirıbege kelip, ata-anasynan jasyryn túrde áskerı «maskırovka» kýrsyna erikti bolyp jazylady. Keıin maıdanǵa alynyp, qorǵanys qurylysy basqarmasynyń 225-quramynda, 104-áskerı qurylys jasaǵynyń sapynda Belorýssııaǵa deıin jetedi. Ardager jeńisti Fınlıandııa shekarasynda qarsy alǵan. Surapyl soǵys aıaqtalǵannan keıin turmys quryp, úsh ul men bir qyz tárbıelep ósiredi. Keıýananyń 11 nemeresi, 29 shóberesi, 3 shópshegi bar.
Pavlodar oblysy
