Foto:depositphotos.com
TJM keshe 21:49-da oqıǵa ornyna Ulytaý jáne Qaraǵandy oblystarynyń Tótenshe jaǵdaılar departamenti (TJD) qyzmetkerleri, kınologııalyq eseptoptar, Apattar medısınasy ortalyǵynyń dárigerleri men Qazaqstan TJM psıhologtary jiberilgenin habarlaǵan.
Avarııalyq-qutqarý nátıjesinde 18 aqpan saǵat 3:27-de aldymen alty kenshiniń denesi tabyldy. Olardyń jeke basyn anyqtaý sharasy dereý qolǵa alynǵan. TJM jetinshi kenshiniń denesiniń tabylǵanyn 7:27 -de málimdedi.
Shahtanyń opyrylýy sebepterin anyqtaý jáne zardap shekkenderge kómek kórsetý jóninde Úkimettik arnaıy komıssııa quryldy.
Komıssııany Premer-mınıstrdiń orynbasary Q.Bozymbaev basqarady.
Vıse-premerge memlekettik organdar men uıymdardyń jumysyn úılestirý úshin TJ ornyna shuǵyl barý tapsyryldy.
Qaıǵyly oqıǵaǵa baılanysty Memleket basshysy qaza bolǵandardyń otbasyna kóńil aıtý jedelhatyn joldap, tıisti materıaldyq qoldaý kórsetiletinin aıtty. Memleket basshysy Úkimetke tótenshe jaǵdaıdyń mán-jaıyn muqııat tekserý jóninde mindet júktedi.
Salalyq vedomstvolar men óńir ákimdigine marqumdardyń otbasylaryna barlyq qajetti kómek kórsetý týraly tapsyrma berildi.
Ulytaý oblystyq polısııa basqarmasy qaıǵyly oqıǵaǵa baılanysty qylmystyq is qozǵalǵanyn habarlady.
«Qazaqmystyń» baspasóz qyzmeti «Jomart» kenishinde tótenshe jaǵdaıǵa aldyn ala málimetter boıynsha tabıǵı gazdyń jarylýy sebep bolýy múmkin ekenin málimdedi.
