Ádebıet mektebi – elimizdegi tuńǵysh avtorlyq joba. Máselen, Oqý-aǵartý mınıstrliginiń tapsyrmasy aıasynda oqýshylar arasynda ulttyń ımýnıtetin kóterý maqsatynda qazaq ádebıetiniń alyptaryna arnalǵan respýblıkalyq túrli jarys ótedi. Bul qatarda «Abaı», «Mahambet», «Maǵjan», «Ilııas» oqýlary bar. Osyndaı baıqaýlarǵa elimizdegi ár mektep qatysýǵa mindetti. Sondyqtan qazaq tili men ádebıeti pániniń mamandary janushyra shákirt izdeıdi. Bylaısha aıtqanda, joqtan bar jasaıdy. Tipti keıbiri óleń men essesin ózi jazyp berip, bolmasa bireýge aqy tólep jazdyryp alyp, oqýshyny qatystyrady. Mundaıda qazaqtyń «jetelep qosqan tazy túlki almaıdy» degen máteli eske túsedi. Onyń ústine ustazdyń ózi óleń-jyrdyń qurylymyn bilmegendikten, ony bireýge úıretemin deýi de bos áýreshilik. Sondyqtan Jetisý oblysy ákimdiginiń qoldaýymen elimizde tuńǵysh ret ashylǵan «Mızam» jyljymaly ádebıet mektebiniń mańyzy zor. Atalǵan joba aıasynda bilikti qalamgerler aýyl-aýyldardy aralap, shyǵarmashylyqqa qushtar jastarǵa sabaq beredi.
«Ádebıet mektebi shyǵarmashylyqtyń jeti baǵyty boıynsha jumys isteıdi. Áýeli jas qalamgerlerdi óleń, shaǵyn áńgime, maqala, esse, shyǵarma jazýǵa mashyqtandyrady. Poezııa, proza janrynda qalam terbegen jetisýlyq aqyn-jazýshylardyń eńbegin nasıhattaı otyryp, jeke jazý stılin qalyptastyrady. Jas qalamgerlerdi memlekettik merekeler men ataýly kúnderde birlese jumys isteýge tarta otyryp, olardyń boıyndaǵy otansúıgishtik qasıetterin oıatýǵa kúsh salady», deıdi joba lektory, aqyn Jumataı Ámireev.
Ádebıet mektebine oblystaǵy shyǵarmashylyqqa qyzyǵýshylyǵy bar 6–10 synyp aralyǵyndaǵy oqýshylar qatysa alady. Kóshpeli mektep oblys qalalaryn qosa eseptegende ár aýdan ortalyǵynda bir apta sabaq ótkizedi. Oqý kýrsynda oqýshylar jazý máneri men oqý ádebi baǵytynda ekige bólinip, tálimgerlermen birlese jumys isteıdi. Sabaq barysynda úzdik nátıje kórsetken oqýshylar aqtyq synǵa arnalǵan shyǵarmashylyq baıqaýǵa joldama alady.
«Munda aýyldaǵy ádebıetke áýes oqýshylar aqyn-jazýshylardy Taldyqorǵanǵa izdep kelmeıdi, kerisinshe, óńirdegi tanymal qalamgerler aýylda júrgen talanttardy ózderi izdep barady. Ádebıet mektebine ár aýdannan 20 oqýshy qabyldanady. Olarǵa kýrsty tolyq aıaqtaǵany týraly sertıfıkat tabystalady. Jalpy, oblysta 8 aýdan, 2 qalany qosqanda 200 balany oqytýdy josparlap otyrmyz. Sabaq barysynda úzdik nátıje kórsetken oqýshylarǵa oblys ákimdiginiń arnaıy syılyǵy bar», deıdi mádenıet, arhıvter jáne qujattama basqarmasynyń basshysy Qýanysh Súleımenov.
Ádebıet álemine qadam basqan jastardyń jolyn týralap, qalamyn ushtap, baǵytyn belgilep berý kóp jyldan beri eskerilmeı kele jatqan dúnıe. Mektep jasynda jazýshy, nemese aqyn bolýdy armandaǵan talaı bala jón silter ustaz bolmaǵan soń ómirdegi jolyn basqa jaqtan taýyp ketti. Endi osy olqylyqtyń ornyn toltyrýda «Mızam» ádebı mektebi iske kirispek.
«Jylda oblystyq «Daryn» ortalyǵy qazaq ádebıetiniń talantty ókilderine arnap baıqaýlar uıymdastyrady. Aýdanǵa arnaıy hat joldap, aýyl-aýyldardan iriktep ár atalym boıynsha bir-bir oqýshydan ákelýdi tapsyrady. Oblystan berilgen tapsyrma bolǵandyqtan ári jas daryndardy anyqtaýǵa jol ashatyndyqtan aýdandyq bilim bólimi oqýshy daıyndaýdy mektep ákimshiligine júkteıdi. Árıne, shyǵarmashylyqqa beıim oqýshylar joq deı almaımyz, biraq olarǵa baǵyt-baǵdar beretin sol salanyń jetekshi mamany jetispeıdi», deıdi qazaq tili men ádebıeti pániniń muǵalimi Raýan Myrzahmet.
Aıta keteıik, odan bólek úzdik oqýshylar arasynda baıqaý aldynda negizgi tálimgerlerden bólek, elge tanymal, belsendi aqyn-jazýshylar qonaq dárisker retinde sheberlik saǵatyn ótkizetin bolady.
Jetisý oblysy
