Áýeli zaýyttyń kadr bólimine Dılıara Talǵatqyzy jumysqa ornalasypty. Is qujatyna myǵym judyryqtaı qyz ózine tapsyrylǵan sharýany shıratyp áketedi. Bos jumys oryndar jármeńkesine úzbeı baryp, zaýytqa jumysshy mamandardy jınaıdy. Sóıtip júrgende Mıras Qanatuly áli ashyla qoımaǵan zaýytqa qujatyn ótkizipti. Sodan alǵashqylardyń biri bolyp Tashkenttegi turmystyq tehnıka shyǵaratyn jeti birdeı zaýytta taǵylymdamadan ótip, tájirıbesin jetildiredi.
Mıras – Qaraǵandy zertteý ýnıversıteti hımııa fakýltetiniń úzdik túlegi. Oqýyn oıdaǵydaı bitirgen soń otan aldyndaǵy boryshyn óteýge attandy. Áskerı sapta júrip te ózin jan-jaqty kórsete bilgen sarbaz túrli oqý-jattyǵý jıynynda ozyq boldy. Sodan soń «AlsKazlab» synaq zerthanasyna hımık bolyp ornalasty. Ondaǵy mindetin de minsiz atqardy. Taǵy da ózi bilim alǵan ýnıversıtetke zańger mamandyǵyna qosymsha oqýǵa túsedi. Quqyq qorǵaý salasynda da eńbek etedi. Sóıtip júrip kelinshegi Dılıara ekeýi keńesip, jańa zaýyttan jarqyn bolashaq izdeıdi. Qazir ol kásiporynnyń bildeı bir jaýapty mamany.
Mırastyń qaı isti bolsyn domalatyp áketetin qabileti bar. Sonyń arqasynda az ýaqyt ishinde oǵan asúı peshin qurastyratyn sehty basqarýdy senip tapsyrady. Qazir onyń sehynda 25 jumysker bar. Asúı peshiniń «Artel», «Shivaki», «Arg», «Apetito» brendimen 62 túrin qurastyrady. Kúnine 350-400 pesh ázirleıdi. Olardy tolyq qurastyryp, tehnıkalyq tekseristen jiti ótkizip, esh kedergisiz jumys isteıtinine kóz jetkizip, qaptap, qujatyn sáıkestendirip, qoımaǵa jóneltedi. О́ndiristiń eń úlken bóligine jaýapty maman jumysshylarynyń sharýasyn uıymdastyryp, jańadan kelgen qyzmetkerlerdi oqytyp, qaýipsizdik sharalaryn qadaǵalaıdy. «Bastysy, ónimniń sapasy men kúndelikti jospardy oryndaý», deıdi ol.
Kelinshegi Dılıara da zaýyttyń otymen kirip, kúlimen shyǵatyn bilikti kadrdyń biri. Búginde eńbegi elenip, kásiporyn ákimshiliginiń jaýapty mamany bolyp taǵaıyndaldy. Seriktestiktiń qoǵam jáne memlekettik mekemelermen baılanys basqarmasyna jetekshi bolǵan Dılıara Talǵatqyzynyń moınyndaǵy jaýapkershilik orasan. Syrttan kelgen meımandardy qarsy alyp, zaýyt tirshiligimen tanystyrýdan basqa, iskerlik qaǵaz, qujattarmen damyl tappaıdy.
«Biz osy zaýyt ashylmas buryn otaý qurǵanbyz. Eńbek etip júrgen zaýytymyzdyń óndirisi de órken jaıyp, qanaty qataıyp keledi. Kúıeýim zaýyttaǵy ozat jumysshynyń biri. Zaýytpen qatar qanat jaıyp kelemiz. Osy jerde júrip, jańa baspanaǵa qol jetkizdik, jańa kólik aldyq. Basshylyq eńbegimizdi elep, qyzmetimizdi de joǵarylatyp jatyr. Eki qyzymyz bar. Olardyń da oqý úlgerimi jaqsy. Táýbe deımiz, barlyǵy eńbektiń arqasy. Bastysy, kúıeýim ekeýmiz úıde de, jumysta da birgemiz», deıdi Dılıara.
Jubaılar bos ýaqyttaryn tıimdi ótkizedi. Úıiniń janyndaǵy sporttyq keshende birge jattyǵady. Kúndelikti shahmat oınap, oılaryn shynyqtyrady. Jas otaý jaqynda jańa shańyraqqa qonys aýdardy. Otandyq ónimdi qoldap, páterlerine ózderi eńbek etip júrgen «Silk Road Electronics» kásipornynan elektr taýarlaryn satyp aldy. «Artel» brendimen teledıdar, elektrli sý jylytqysh, shańsorǵysh, asúı toqpeshi, aýasorǵysh, kir jýatyn mashına, jeldetkish sekildi turmystyq tehnıka túrlerin qoldanyp otyr.
– Zaýyt otbasymyz úshin berekeli boldy. Kásiporynnyń keleshegi zor. Búginde álemdik naryqqa shyqty. Jumysshylarǵa barlyq jaǵdaıdy qarastyrǵan. Joǵary jalaqy, úı men jumys arasynda avtobýspen tasymaldaý, tegin túski as, tolyq áleýmettik paket usynady. Tájirıbe tolyqtyryp, bilim arttyramyn degenderdi arnaıy oqytady. Onda da kúnbe-kún jalaqysy júrip jatady. Zaýytta áli de bos jumys oryndary bar, – deıdi M.Qanatuly.
Qaraǵandy oblysy
