Igi bastamany «AMANAT» partııasynyń músheleri qolǵa alyp, ony «Jastar rýhy» jastar qanatynyń eriktileri men aýyl turǵyndary qoldady. Jalpy senbilikke 30-ǵa jýyq adam qatysyp, birneshe saǵat ishinde 6 tonna qoqys jınady.
Aýyl kóshelerin qoqystan tazartý – turǵyndar úshin ózekti máselege aınalǵan. Ásirese, qurylys qaldyqtary – beton synyqtary, kirpishter, taqtaılar men plastık panelderdiń kóringen jerde shashylyp jatqany kóńilge kirbiń túsiretin. Qorshaǵan ortaǵa nemquraıdy qaraıtyn turǵyndardyń keıbiri qaldyqtardy arnaıy oryndarǵa shyǵarmaı, jol jıegine nemese ashyq jerlerge tóge bergen.
«Keıbir turǵyndar jóndeý jumystarynan keıin qaldyqtardy kez kelgen jerge tastaı salǵan. Aýylymyz lastanyp, qoqys kún sanap kóbeıe berdi. Sondyqtan «AMANAT» partııasynyń músheleri senbilik uıymdastyratynyn aıtqanda birden qoldadyq», deıdi aýyl turǵyny.
Ekologııalyq aksııanyń basty maqsaty – tek qoqys jınaý ǵana emes, aýyl turǵyndaryn qorshaǵan ortaǵa jaýapkershilikpen qaraýǵa shaqyrý. Uıymdastyrýshylardyń aıtýynsha, máseleni bir rettik senbilikpen sheshý múmkin emes, eń bastysy – qoqystyń qaıta jınalýyna jol bermeý. Sondyqtan budan bylaı aýyl turǵyndary apta saıyn senbilik ótkizip, tazalyqty saqtap otyrýǵa kelisti.
«Bizdiń maqsatymyz – tek kóshelerdi tazartý ǵana emes, turǵyndarǵa tazalyq mádenıetin úıretý. Tazalyq jumystary kezinde turǵyndar qoqystyń qanshalyqty kóp ekenin kórdi. Eger ár adam qorshaǵan ortany taza ustaýǵa atsalyssa, mundaı lastaný múldem bolmas edi», dedi «AMANAT» partııasynyń múshesi Bekjan Súnbekov.
Jınalǵan barlyq qoqys suryptalyp, arnaıy oryndarǵa shyǵaryldy. Uıymdastyrýshylar mundaı bastamalar aýyldaǵy ekologııalyq ahýaldy jaqsartýǵa úles qosatynyna senimdi.
