Kóbinese ana men balanyń meıirimine ǵana kýá qoǵam, er adam men bóbektiń arasyndaǵy meıirimge toly kórinisti asa «túsine almaǵany da» ras. Degenmen olardy ne baılanystyratynyn bilgende, tań qalmaǵan jan qalmady.
Týa sala anasy bas tartqany azdaı, týyla sala ómiri úshin kúresip birneshe aı arnaıy medısınalyq qondyrǵylarǵa tańylǵan bóbek pen ony kútýshi neonatolog dárigeriniń úsh aı boıy bir birine baýyr basqan kórinisi eken.
Neonatolog dáriger Berik Aldııarovtyń aıtýynsha, náreste óte álsiz bolyp týylǵan. Dárigerler ony apparattarǵa qosyp, kúndiz-túni baqylaǵan. Ýaqyt óte kele ol óz betinshe dem alýdy úırenip, tolyq saýyǵyp ketken. Anasy bas tartqan qyz balany dáriger balalar úıine alyp ketkenshe ózi qaraǵan. «Alǵashqy kúnder óte aýyr boldy. Ár saǵat saıyn biz áriptesterimizben birge onyń júregi soǵýyn jalǵastyrý úshin bárin jasadyq. Biz apparattardy rettep, dáriler engizip, onyń názik denesin jylytyp, anasynyń ishindegi jylýlyqty eske salyp otyrdyq. Aptalar ótti. Bala birtindep kúsh jınaı bastady. Ol ózdiginen tynys alýdy úırendi. Biz onyń jetistikterine bárimiz jan-tánimizben qýandyq. Men kóz jasymdy ustaı almadym. Ol maǵan úlken kózderimen qarady, biz onyń ómiri úshin bar janymyzben kúreskenimizdi biletin sııaqty boldy. Qandaı kúsh pen ómirge degen erik-jiger osyndaı kishkentaı adamda bolýy múmkin», — deıdi dáriger sol kúnderdi eske alyp.
Qoǵamda ár mamannyń orny bólek. Degenmen mamandyǵyna baryn salyp qyzmetin meıirimimen, bar ynta jigerimen jasaıtyndar az ekeni ras. Sol azdyń biri Berik Aldııarovtyń shaqalaqtyń ómirin saqtaýǵa baryn salyp, anasynyń ornyna óz týǵan anasyndaı meıirimi men qamqorlyǵyn tógýi talaılardyń júregin jibitti. Ádette ataqtylar ǵana marapattalyp jatatyn qoǵamymyzda qarapaıym azamattardy da elep eskerip, erekshe áreketimen nemese eńbegimen kózge túsken jandardy qýantyp júretin Dınara Berdimurat meıirimdi dárigerdi arnaıy «El janashyry» tósbelgisimen marapattady. Árqashan Jańa Qazaqstanymyzdyń damýyna úles qosyp júrgen tulǵalarymyzdyń eńbegin elep, eren eńbegine saı qurmet kórsetiletin bul marapattyń jóni bólek. Qoǵamdaǵy adal qyzmetimen kózge túsip júrgen jandardy basqalarǵa úlgi etý maqsatynda jasalatyn bul shara qazir dástúrli marapatqa aınalyp keledi.
Osy oraıda aıta ketsek, Prezıdent Qasym-Jomart Toqaev eńbek adamdaryna qurmet kórsetý kerek ekenin birneshe ret atap ótken bolatyn. Al mundaı marapattar qarapaıym azamattardy yntalandyryp, qoǵamdy izgilendirýge yqpal eteri anyq! Kóriniske súısingender kóp bolǵanymen, ony sol áreketi úshin elep eskerip, qurmet kórsetý Dınara Berdimurattyń ǵana qolynan keldi. Mamandyǵyna adaldyq tanytyp, qoǵamǵa meıirimdilik dánin seýip júrgen dáriger Berik Aldııarovqa da, beıbit kúnniń batyryna laıyq qurmet kórsetkeni úshin Dınara Berdimuratqa da alǵysymyz sheksiz! Álemdi meıirimdilik qutqarady…
