Oǵan oblystyq jáne aýdandyq mýzeıler men týrıstik qyzmet kórsetý salalarynan 15 maman qatysty. Mýzeı isinde qundy jádigerler men eksponattar jınaı bilýden ózge, kórnekilikke qoıylǵan jáne qorda saqtalǵan dúnıelerdi kelýshilerge saýatty da qyzǵylyqty etip tanystyra bilý óte mańyzdy. Erte dáýirden jetken eksponattyń boıynda ótken tarıhtyń boıaýy sińgen, sol dáýir adamdary qolynyń izi qalǵan. Muny syrt adam kóp baıqaı bermeıdi. Ekskýrsııa júrgizýshisi boıynda eksponatty uǵyna biletin baıqampazdyq pen ony kelýshilerge saýatty túrde baıandaı biletin sheberlik qasıet ushtasa bilse, mýzeı jumysynyń baǵy jandy deýge bolady. Sondyqtan osy salanyń mamandarynan mýzeı qyzmetiniń zamanaýı tásilderin meńgerý men kásibı sheberligin úzdiksiz jetildirý talap etiledi. Osy maqsatta ótkizilgen saıys tórt kezeńnen turdy: ózin jáne jumysyn jurt aldynda tanystyrý, kásibı jetistikterin kórsetetin portfolıo daıyndaý, eńbek etetin mekemesiniń tarıhynan úsh mınýttyq kórinis ázirleý, óńirdegi qandaı da bir tarıhı-mádenı eskertkish boıynsha teatrlandyrylǵan ekskýrsııa júrgizý.
Jeńimpazdarǵa birneshe júlde qory belgilendi. Eń birinshi orynǵa – 300 myń teńge, birinshi orynǵa – 200 myń teńge, ekinshi orynǵa 150 myń, úshinshi orynǵa 100 myń teńge taǵaıyndaldy. Sondaı-aq, basqa da nomınasııalar boıynsha 50 myń teńge kóleminde yntalandyrý syılyqtary belgilendi.
Nátıjesinde óńirdegi úzdik ekskýrsııa júrgizýshi ataǵyn Keńester odaǵynyń batyry Álııa Moldaǵulovanyń memorıaldyq mýzeıi qyzmetkeri ıelense, birinshi oryn Qarabutaq aýylynyń mýzeıine, ekinshi oryn «Yrǵyz-Torǵaı» rezervaty mýzeıine, úshinshi oryn Muǵaljar aýdandyq mýzeıine buıyrdy. Aıta ketý kerek, «Úzdik ekskýrsııa júrgizýshisi» baıqaýy óńirde alǵash ret byltyr mektep oqýshylary arasynda uıymdastyrylǵan. Bıylǵy jyly saıys mádenıet mekemeleri mamandarynyń arasynda ótti. Aldaǵy jyldary tyń bastama jalǵasyn tabady degen úmit bar. Baıqaý júrgizýshilerdiń adal básekede shyńdalyp, kásibı biliktiliginiń artýyna, izdenis aıasyn keńeıtýine jol ashady degen senim bar.
