Foto: pxhere
Munaıly shahar mańyndaǵy Qaıyrshaqty aýyldyq okrýginde tirkelgen «Abdýlla» sharýa qojalyǵynyń ókili Nurbek Esenqulovtyń aıtýynsha, sharýashylyqta 105 sıyr bar. Qojalyqtyń maly Sokolok kanalynan sý ishedi.
«Bizdiń sharýashylyqta múıizdi iri qaradaǵy qotyr aýrýy byltyrǵy qazan, qarasha aılarynda anyqtaldy. Sodan beri 15-20 sıyrdan qotyr shyqty. Bul aýrýǵa negizinen sıyrdyń atalyq túri shaldyqty. Múıizdi iri qaranyń júni túsip qaldy. Orny qyzaryp, qany shyǵyp turdy. Soǵan baılanysty veterınar shaqyryp, ekpe saldyrdyq. Sodan keıin toqtaǵandaı boldy. Biraq áli tolyq joıylǵan joq», deıdi Nurbek Esenqulov.
Onyń aıtýynsha, bastapqyda kanaldaǵy sýdan kúdiktengen. О́ıtkeni qazir kanalda aǵys joq. Sý azaıǵan.
«Alaıda veterınarlar bul aýrýdyń shyǵýyna kanal sýynyń áseri joq dep otyr. Qańtardan beri sharýashylyǵymyzdaǵy múıizdi iri qara eki ret egildi. Úlkenderdiń aıtýymen motordyń paıdalanylǵan maıyn jaqtyq», dedi Nurbek Esenqulov.
Veterınarııalyq baqylaý jáne qadaǵalaý komıteti Atyraý oblystyq aýmaqtyq ınspeksııasynyń basshysy Nurjan Úsenbaevtyń pikirinshe, qotyr asa qaýipti aýrýlar qataryna jatpaıdy.
«Sol sebepten alańdaıtyndaı negiz joq. Al aýrýdyń shyǵýyna malǵa mezgilinde ekpe saldyrmaý sebep bolady. Qorany qys mezgiline deıin tazalap, dezınfeksııalaý qajet. Mine, osyndaı jumystar jasalmasa, mal qotyrǵa shaldyǵýy múmkin. Endi aýyrǵan malǵa sharýa qojalyǵynyń ıeleri óz esebinen ekpe saldyrýy kerek. О́ıtkeni memleket tarapynan qotyrǵa shaldyqqan maldy emdeýge qoldaý kórsetilmeıdi», dep málimdedi Nurjan Úsenbaev.
Atyraý oblystyq aýyl sharýashylyǵy jáne jer qatynastary basqarmasynyń basshysy Amangeldi Salamattyń aıtýyna qaraǵanda, jergilikti aýa raıynyń jylylyǵy da qotyrdyń shyǵýyna áser etýi múmkin.
«Qotyr Atyraý qalasynyń mańyndaǵy sharýa qojalyqtarynda ǵana anyqtalyp otyr. Qazir basqarmanyń mamandary sharýa qojalyqtarynda tekserý júrgizýdi, fermerlerge keńes berýdi qolǵa aldy. Aýa raıynyń qolaıly kezeńinde maldy qoraǵa qamamaý qajet. Muny sharýa qojalyǵynyń jetekshileri eskerýi kerek», deıdi Amangeldi Salamat.
