Sýret: dknews.kz
«Byltyr energetıkalyq jáne kommýnaldyq ınfraqurylymdy jańǵyrtýǵa arnalǵan ulttyq joba qabyldandy. Bul joba aıasynda ónerkásip salasyn damytý úshin jańa ónimder shyǵarý da qolǵa alynbaq. Otandyq kásiporyndar negizgi suranystyń 40 paıyzyn ǵana óteı alady», dedi Memleket basshysy.
Joldaýdy iske asyrý sharalarynyń biri retinde «Energetıkalyq jáne kommýnaldyq sektorlardy jańǵyrtý» ulttyq jobasy qolǵa alyndy. Vıse-premer Qanat Bozymbaev jobany iske asyrý jónindegi jobalyq keńseniń alǵashqy otyrysynda ulttyq joba ınfraqurylymnyń tozý deńgeıin tómendetýge, kommýnaldyq qyzmetterdi úzdiksiz usynýdy qamtamasyz etýge baǵyttalǵanyn aıtqan bolatyn.
Qazir jylý, elektr energııasy, sýmen jabdyqtaý, sý burý salalarynda qyzmet kórsetetin 87 monopolıst kásiporyndaǵy energetıkalyq, kommýnaldyq ınfraqurylymnyń tozý deńgeıi 65%-dan 100%-ǵa deıin jetken. Osyǵan baılanysty jobalyq keńsege ınjenerlik jeliler tozýyn 40%-ǵa deıin tómendetý, elektr energııasyn óndirýdiń jańa kózderin (qosymsha 7,3 GVt) salý mindeti qoıyldy.
«2029 jylǵa deıin kommýnaldyq jelilerdi jańǵyrtýǵa ınvestısııalyq qajettilik 6,8 trln teńgeni, elektr energııasyn óndirýge 6,2 trln teńgeni quraıdy. Ekinshi deńgeıli bankterden, ulttyq qarjylyq damý ınstıtýttarynan, halyqaralyq qarjy uıymdarynan qarajat tartylady. Tabıǵı monopolııa sýbektilerin qarjylandyrý tetigin qurý, jeńildetilgen qarjylandyrýǵa nemese sýbsıdııalaýǵa ótinimderdi qarastyrý «Báıterek» UBH» AQ-ǵa júktelgen. Jobalardyń júzege asyrylý barysyna, qurylys-montajdaý jumystaryna baqylaý júrgizý «TKSh Qazortalyq» AQ-nyń quzyretine bekitilgen», dedi Úkimet basshysynyń orynbasary.
Ulttyq jobada otandyq ónerkásiptiń damýyna erekshe nazar aýdarylyp, jumys istep turǵan kásiporyndardy 100% júkteýmen qatar, 27 jańa óndiris oryndaryn ashý, jumys oryndaryn qurý josparlanǵan. О́nerkásip jáne qurylys mınıstrligine otandyq taýar óndirýshiler óndiretin taýarlar, jumystar, qyzmetter tizimin ázirleý, josyqsyz qatysýshylar tizimin engize otyryp, satyp alýdyń biryńǵaı elektrondyq nysanyn engizý tapsyryldy.
Bul rette halyqtyń áleýmettik turǵydan osal sanattaryn qoldaý sharalary da jıi aıtylyp júr. Tólem qabileti bar toptar kommýnaldyq qyzmetterdi ádil, naryqtyq tarıfter boıynsha tóleýi kerek. Osal sanattaǵylar turǵyn úı avtomattandyrylǵan júıesi arqyly tarıfterdiń ósýinen qorǵalýǵa tıis deıdi mamandar.
Energetıka jáne kommýnaldyq sharýashylyq salasyndaǵy problemalar eń ózekti máselelerdiń biri, olar keshendi ári jedel sheshýdi talap etedi. Ulttyq ekonomıka mınıstrligi múddeli memlekettik organdarmen, uıymdarmen birlese otyryp, Ulttyq jobany iske asyrýdyń Jol kartasyn ázirledi. Jobany sátti júzege asyrýǵa mınıstrlikter, ákimdikter men jeke sektordyń ózara yntymaqtastyǵy, sondaı-aq azamattardyń belsendi qatysýy qajet.
