Oblys kóleminde shalǵaıdaǵy Moıynqum aýdany ǵana kógildir otynǵa zárý bolatyn. Sońǵy jyldary alystaǵy aýdan eldi mekenderin tabıǵı gazben qamtý maqsatynda aýqymdy jumys qolǵa alynǵan.
«Osy jyly óńirdiń 5 myńnan astam turǵyny gazben qamtamasyz etiledi dep josparlandy. Naqty aıtsaq, búgingi kúni óńirdegi eldi mekenderdiń 78 paıyzy gazben qamtylǵan, ıaǵnı, 371 eldi mekenniń 288-i tabıǵı gazǵa qosylǵan. Byltyr Qordaı aýdanynyń 3 aýylyna gaz júrgizilip, oblys halqynyń gazben qamtylý deńgeıi 91,3 paıyzdy qurasa, bıyl 9 aýylǵa tabıǵı gaz kirgizilip, turǵyndardyń gazben qamtylý kórsetkishin 91,8 paıyzǵa jetkizý kózdelip otyr.
Osy jyly Sarysý aýdanynyń 14 eldi mekenin gazben qamtý úshin «Evrohım-Qarataý» jáne Shý aýdanynyń 18 eldi mekenin gazdandyrý úshin «Shý» avtomatty gaz taratý stansııalarynyń (AGTS) qurylysy júrgizilýde. Olardyń jalpy quny – 41,9 mıllıard teńge. Sonymen qatar, Moıynqum aýdanynyń eldi mekenderin gazdandyrý jobasy bastalyp, jospardaǵy 9 aýyldyń bastapqy úsheýine (Aıdarly, Birlik, Bınazar) jalpy quny 18,5 mıllıard teńgeni quraıtyn gaz qubyrlaryn salý jumystary júrgizilip jatyr», deıdi oblys ákimdiginiń energetıka jáne turǵyn úı-kommýnaldyq sharýashylyq basqarmasy basshysynyń orynbasary Damır Tuńǵatov.
