Qıly kúnderdiń qyspaǵynan aman ótken Sársenbaı qarııa 1924 jyly 10 mamyrda dúnıege kelgen. Ol 1942 jyly áskerge shaqyrylyp, Aıagózde jasaqtalǵan tuńǵysh qazaq polkiniń quramyna alynǵan. Avtomatshylardy daıarlaıtyn alty aılyq oqý-jattyǵýdan soń, soǵystyń naǵyz qaınaǵan ortasyna túsedi. Bir jyldan soń, sany sıregen sarbazdar Baýyrjan Momyshuly basqarǵan 9-gvardııalyq dıvızııaǵa qosylypty. Olarǵa sol kezdiń eń qaýipti ári qupııa qarýyn kúzetý mindeti júktelgen.
«Biz qupııany saqtaımyz dep ant bergenbiz. Ol kezde «Katıýsha» týraly aıtylmaıdy. Qupııa bólimde boldyq. № 49 katıýshany kúzettik. Bir jerde 15 mınýt turady, odan artyq turmaıdy. Kúndiz toǵaıdyń ishine ketip qalady. Qaı jerge jaý áskeri kóp jınalady, sony atady. Baýyrjan Momyshuly qatal da, ádil adam ǵoı. Buıryq beredi. Artyńda Otanyń, áke-shesheń, eliń-jurtyń tur dep jigerlendiredi», deıdi aqsaqal sol kúnderdi eske alyp.
9-gvardııalyq atqyshtar dıvızııasynyń sapynda Sársenbaı aqsaqal Polsha, Lıtva, Latvııa, Estonııa syndy elderdi azat etýge qatysqan. О́miriniń úsh jylyn maıdan dalasynda ótkizgen ol Germanııaǵa deıin jetedi. Sol memleket aýmaǵyndaǵy shaıqas kezinde, 1945 jyldyń 21 qańtarynda Baýyrjan Momyshulymen qatar jaralanǵan. Jaraly soldattardy ushaqqa salyp, Máskeýge jiberedi. Vladımır oblysy Kalchıýgın qalasynda emdeledi, Jeńisti sol jerde qarsy alady. Sársenbaı aqsaqal Baýyrjan Momyshulymen soǵystan keıin de dámdes-tuzdas bolǵanyn aıtady.
Maıdanger elge kelgen soń, muǵalim jáne poshtashy bolyp eńbek etken. Sodan bolar áli kúnge deıin baspasózdi sholyp, radıony tyńdap, telearnadan jańalyqtardy kórýge tyrysady. Júzge jýyq nemere, shóbere súıip otyr. Sársenbaı aqsaqal qazir kenje nemeresiniń kútiminde.
Bıyl atalyp ótetin Uly Otan soǵysyndaǵy Jeńistiń 80 jyldyǵy qarsańynda Ulttyq ulanda «Jeńiske 100 kún qalǵanda» aksııasy júrip jatyr. Osy is-shara aıasynda soǵys jáne tyl ardagerleri úshin kóptegen ıgi ister atqarylýda.
