Kelissózder barysynda taraptar saýda-ekonomıkalyq yntymaqtastyqtyń perspektıvalaryn, sondaı̆-aq aýyl sharýashylyǵy, týrızm jáne kásipkerlik salasyndaǵy josparlardy talqylady.
Kezdesýde eki eldiń iskerlik qoǵamdastyǵyn birlesken jobalarǵa belsendi tartý arqyly seriktestikti damytýǵa ózara múddelilik bildirildi. Qazaqstan men Qyrǵyzstan 33 jyl boı̆y dostyq jáne yntymaqtastyq dástúrlerine negizdelgen tatý kórshilik qarym-qatynasty saqtap keledi. Osy ýaqyt ishinde ekonomıka, logıstıka, mádenıet jáne bilim berý sııaqty túrli salalardy qamtıtyn 150-den astam kelisimdi qamtıtyn berik sharttyq-quqyqtyq baza qalyptasty.
«Eki memleket úkimetaralyq, parlamentaralyq jáne óńiraralyq deńgeı̆lerde belsendi yntymaqtastyq ornatyp keledi. Tek sońǵy jyldyń ishinde ǵana el basshylary ártúrli is-sharalar aıasynda altydan astam kezdesý ótkizdi. Biz bul baı̆lanysty odan ári nyǵaı̆typ, jańa jobalardy iske qosyp, seriktestik deńgeı̆in kóterýimiz kerek», dedi óńir basshysy Marat Sultanǵazıev.
Kezdesýde ekonomıkalyq ózara is-qımyl, logıstıka jáne birlesken bastamalardy júzege asyrý máselelerine erekshe nazar aýdaryldy. Qyrǵyzstan – Qazaqstannyń negizgi saýda seriktesteriniń biri, al 2024 jyly Almaty oblysy men kórshiles respýblıka arasyndaǵy taýar aı̆nalymy 12%-ǵa ósip, 150 mln AQSh dollaryn qurady. О́ńirde qyrǵyz kapıtalynyń qatysýymen 31 kásiporyn jáne 8 birlesken kompanııa jumys isteı̆di. Sondaı̆-aq qyrǵyzstandyq aýyl sharýashylyǵy óndirýshileri úshin kóterme taratý ortalyǵyn qurý múmkindigi qarastyrylýda. Bul logıstıkany jaqsartyp, kólik shyǵyndaryn azaı̆týǵa múmkindik beredi.
«Bizdiń basty mindetimiz – eki el arasyndaǵy saýda-ekonomıkalyq jáne mádenı-gýmanıtarlyq yntymaqtastyqty jandandyrý. Biz taýar aı̆nalymynyń ósýine, birlesken kásiporyndar qurýǵa jáne ınvestısııalyq jobalardy júzege asyrýǵa múddelimiz. Kásipkerlik qyzmetti keńeı̆tý úshin bıznes-forýmdardy uı̆ymdastyrý mańyzdy», dep atap ótti Jeńishbek Asanqulov.
Sondaı̆-aq taraptar týrızm áleýetin damytý jáne óńiraralyq yntymaqtastyq máselelerin talqylady. Almaty jáne Ystyqkól oblystaryndaǵy tanymal marshrýttardy biriktiretin biryńǵaı̆ taý-týrıstik klasterin qurý múmkindigi qarastyryldy. Bul kóbirek týrıst tartýǵa jáne týrızm ındýstrııasynyń ınfraqurylymyn nyǵaı̆týǵa múmkindik beredi.
Kezdesýde mádenı yntymaqtastyqtyń mańyzdylyǵy ataldy, onyń ishinde akademııalyq almasý baǵdarlamalaryn keńeı̆tý, óner salasyndaǵy seriktestik jáne birlesken mádenı is-sharalar uı̆ymdastyrý máseleleri qaraldy.
Kezdesý sońynda qatysýshylar syndarly dıalog úshin alǵystaryn bildirip, odan ári yntymaqtastyq ekijaqty qatynastardy nyǵaı̆týǵa jáne jańa strategııalyq bastamalardy júzege asyrýǵa yqpal etetinin atap ótti.
