Bizdiń keıipkerimiz Vıktorııa osy aýyldaǵy Oleg Vıýshkınniń otbasynda 2000 jyly dúnıege kelgen. Uzamaı Vıktorııanyń ákesi men sheshesi ajyrasyp, súıkimdi nemeresin ájesi Tamara Aleksandrovna alyp qalyp, ózi ósiredi. Ájesi – osyndaǵy mekteptiń dırektory bolyp uzaq jyldar qyzmet istegen, kózi qaraqty jan. Ol mektepte qazaq synyptaryn ashyp, nemeresi Vıktorııany da qazaqshaǵa beredi. Tili oryssha shyqqan, úıde de, túzde de oryssha sóılep júrgen balaǵa qazaq tilin úırený ońaı bolmaǵan. Alaıda ájesi onyń qazaq tilin úırenýin qatty qadaǵalap, ózi bilmese de nemeresiniń úırengenin baqylap otyrady. Túsinigi tereń adam Qazaqstanda turǵan adamdardyń bári de qazaq tilin bilgenin qalaıdy. Úıine qazaq aqyn-jazýshylarynyń kitaptaryn da alyp, Vıktorııaǵa oqytyp, mazmunyn surap, tyńdap otyrady.
Asyl ájeniń eńbegi dalaǵa ketpedi, Vıktorııa mektepti «Altyn belgige» aıaqtap, ózi jaqsy kóretin mamandyǵy – polısııanyń Qostanaıdaǵy ýnıversıtetine túsedi. Qazaq qurbylary Vıktorııanyń qazaq tilin bilgenine qyzyǵa qaraıdy eken.
Vıktorııanyń ózi de qazaqshany jetik bilip, tipti orys tiline qaraǵanda ony úzdik ıgerip alǵan. Tipti qazaqtyń dilin de tanyp, boıyna sińiredi. Ol ol ma, 2023 jyly ıslam dinin qabyldap, meshitte ımamnyń azan shaqyrýymen Bádrısafa degen musylman esimin alady. «Bádrısafany» qaıdan aldyń degen suraqqa ult ustazy Ahmet Baıtursynulynyń jary, orys qyzy Aleksandra Ivanovnanyń ıslam dinin qabyldaǵanda «Bádrısafa» atyn alǵanyn basshylyq etkenin aıtady.
«Qostanaıda oqyp júrgende, Ahmet Baıtursynuly týraly kıno kórgen edim. Sol fılmnen onyń jary «Bádrısafa» atyn alǵanyn bildim. Sondyqtan ıslam dinin qabyldaǵanda men de «Bádrısafa» bolýdy qaladym. Bul sózdiń maǵynasy da ǵajap eken, «Bádrýn» degen tolyq aıdy, «safa» (saf) degen kirshiksiz taza degendi bildiredi. Sonymen, «kirshiksiz taza tolyq aı» bolyp júrmin», deıdi Bádrısafa.
Qazir Bádrısafa Petropavl qalalyq 1-polısııa bóliminde ýchaskelik ınspektor bolyp isteıdi. Polısııanyń aǵa leıtenanty sheni bar. Barlyq mádenı is-sharaǵa qatysyp, dombyramen án de aıtady. О́ziniń jumysyna da jetik. Qazir Ramazan aıyn tosyp, oraza tutýǵa da daıyndalyp júrgen kórinedi. Aldaǵy armany jaqsy tárbıe kórgen qazaq jigitimen otaý qurý ekenin de aıtyp qaldy. Biz onyń armany oryndalyp, qazaq otbasynyń oshaǵyn tutatyp, baqytty kelin, úzdik polısııa qyzmetkeri atanǵanyn tileımiz.
Soltústik Qazaqstan oblysy
