Foto: Qyrmyzy Jumaǵalıqyzy
Jıynǵa moderatorlyq etken «Qazaq gazetteri» basshysy Dıhan Qamzabekuly elimizdiń bas basylymdary shekaranyń arǵy shebindegi qazaqtardyń qal-ahýalyn únemi zerdelep, el nazaryna usynyp otyrǵanyn atap ótti.
«HH ǵasyrdyń basynda qazaq halqy alaǵaı-bulaǵaı shaqtardy bastan ótkerdi. Túrli memleketterge tarydaı shashyldy. Sondaı syndarly kezde ulttyq baspasóz ózge elde turyp jatqan qazaq dıasporasynyń turmysy, oqýy, qyzmeti týraly aqparattarmen qulaqtandyryp otyrdy. Qazirgi kúnde de bul jaýapkershilik qazaq gazetteriniń moınynan túsken joq. Qandastarymyzǵa jan-jaqty qoldaý kórsetip otyrǵan «Otandastar qorymen» birigip jumys isteýge ázir ekendigimizdi málimdeımiz», dedi D.Qamzabekuly.
Aıta keteıik «Otandastar qory» – sheteldegi qazaqtarmen mádenı-gýmanıtarlyq qarym-qatynasty nyǵaıtý negizinde olardyń ulttyq biregeıligin saqtaý jáne elimizge oralǵan qandastarymyzǵa aqparattyq qoldaý kórsetý maqsatynda qurylǵan aksıonerlik qoǵam. Onyń basshysy Danııar Qadyrov ta «Qazaq gazetteri» ujymyna rızashylyǵyn bildirip, syrttaǵy qandastardyń áleýetin ult múddesine tıimdi paıdalaný kerektigin jetkizdi.
Memorandým aıasynda eki tarap shette júrgen etnıkalyq qazaqtardy tarıhı otanyna shaqyrý, olardyń ishinde óz salasynda úzdik nátıjege jetken bilikti azamattardy elge nasıhattaý, sondaı-aq qazaqtar kóp shoǵyrlanǵan aımaqtarǵa qazaq basylymdaryn jetkizý sııaqty mańyzdy jobalardy talqylady.
