Sýretti túsirgen – Valerıı BÝGAEV
Kórshi eldiń alpaýyt kompanııalarynyń Ertis boıyna qumartýyna negiz bar. Oblysta munaı-hımııa zaýyty, bolat-qorytpa, alıýmınıı shyǵaratyn kásiporyndar, munaı koksy men kábil ónimderiniń, ferroqorytpa óndirisi jáne ózge de metallýrgııalyq óndiris oshaqtary shoǵyrlanǵan. Elektr qýatyna qatysty másele joq. Zaýyttar kún saıyn tonnalap shyǵaryp jatqan ónim túrlerin ekinshi qaıtara óńdep, daıyn taýar retinde naryqqa jóneltý óndirisi ǵana jetispeı tur. Osy bir tyń jatqan óndiristik alań qytaılyq kásipkerlerdiń kózine túskendeı.
Qytaılyq «Beijing Jinghanlin Mould Manufacturing Co. Ltd» men «Hua An International Investment Management LLP» kompanııalary qazir Pavlodar ákimdigimen kólik dıskisin jáne qosalqy bólshek óndiretin iri kásiporyn qurý týraly kelissóz júrgizip jatyr. Joba quny – 50 mlrd teńge. О́ndiriste jylyna 2 mln dana ónim shyǵarylyp, 100-den astam turaqty jumys orny qurylýy múmkin.
Oblys ákimi Asaıyn Baıhanov atalǵan kompanııa basshylarymen kezdesti. Onda taraptar óńirdegi «Pavlodar» arnaıy ekonomıkalyq aımaǵynyń aýmaǵynda avtokólik ónerkásibine arnalǵan avtokólikterdiń alıýmınıı dıskileri men qosalqy bólshekterin shyǵaratyn kásiporyn salý múmkindigin talqylady.
«Oblys ákimi Asaıyn Baıhanov qolaıly ınvestısııalyq ahýal qalyptastyrý basty basymdyq ekenin atap ótti. Ol kásiporynnyń bolashaǵyn joǵary baǵalady. «Beijing Jinghanlin Mould» kompanııasynyń quryltaıshysy men basshysy Taý Hýachan dóńgelek dıskilerin quıý, synaý tehnologııasy, júk kólikteriniń dóńgelekterine arnalǵan qalyptardy óndirý jáne eksportqa baǵdarlanǵan ónimniń artyqshylyqtary týraly baıandady. Taraptar jobany jan-jaqty talqylaýdy jalǵastyrýdy jáne ony iske asyrý jónindegi aldaǵy ýaqyttaǵy qadamdar týraly ýaǵdalasty», dep habarlady oblys ákiminiń baspasóz qyzmeti.
«Beijing Jinghanlin Mould Manufacturing Co. Ltd» – naryqtaǵy negizgi oıynshy jáne ónimderin Ońtústik-Shyǵys Azııaǵa, Eýropaǵa, Latyn Amerıkasyna, AQSh-qa jetkizetin Qytaıdaǵy eń iri kompanııalardyń biri. Taǵy bir qytaılyq kompanııa «Rezel Catalysts Corporation» avtokólikterge arnalǵan FCC-katalızatorlarynyń óndirisin qurýǵa ynta tanytqan. Jýyqta atalǵan kompanııa ókilderi men «KMH-Katalızatory» JShS basshylyǵy oblysqa arnaıy kelip, óz nıetterin jetkizdi. Qytaılyq ınvestorlar 45 turaqty jumys ornyn qura otyryp, jylyna 10 myń tonna FCC-katalızator shyǵarýǵa 12 mlrd teńge ınvestısııa quıýǵa daıyn.
О́ńir basshysy Asaıyn Baıhanov áleýetti ınvestorlardy qoldap, katalıtıkalyq júıeler esebinen otandyq munaı óńdeý kásiporyndarynda qaıta óńdeý marjasynyń aıtarlyqtaı artatynyn atap ótti. «Rezel Catalysts Corporation» dırektorlar keńesiniń tóraǵasy – bas dırektory Chjoý Jýnshen kompanııasynyń ozyq tehnologııasy – aýyr metaldarǵa tózimdi, sırek kezdesetin elementteri joǵary Ú seolıtin paıdalaný týraly aıtty. Sondaı-aq kómir hımııasyna ınnovasııalyq tehnologııalardy engizýdi birlesip talqylady.
Kezdesý sońynda Pavlodar oblysynyń ákimdigi, «Pavlodar» AEA basqarýshy kompanııasy» AQ, «Rezel Catalysts Corporation» jáne «KMH-Katalızatory» JShS arasynda ınvestısııalyq jobany iske asyrý týraly memorandýmǵa qol qoıyldy. Sonymen birge «Jiansu Jielong Group» kompanııasy óńirde maı estraksııasy zaýytyn salýǵa 10-20 mlrd teńge quıamyz dep ýáde etip otyr. Táýligine 500–1 000 tonna shıkizatty qaıta óńdeıtin kásiporyn ashylsa, aımaqta jyl saıyn tonnalap jınalyp qalatyn kúnbaǵys dánin kádege jaratýǵa múmkindik týar edi.
Pavlodar oblysy
