Mıkelandjelonyń shyǵarmashylyq adamy bolýyna balalyq shaqtaǵy oqıǵalary áser etken.
Ákesi Lıýdovık Sımonı qalalyq rezıdensııada notarıýs bolǵan. Anasy Franchesko dı Nerı Mıkelandjelo alty jasqa tolǵanda ómirden ótedi. Ákesi ekinshi ret úılenedi. Anasynan erte aıyrylǵan bala jetimdiktiń taqsyretin tartady. Ákesi óte qatal adam bolǵandyqtan, ol óz úıinde óte az qonatyn. Tas qashaýshy kórshisiniń úıinen shyqpaıtyn. Onyń shyǵarmashylyq úderisine qyzyǵa qarap otyra beretin.
Mıkelandjelonyń abyroıyn asyryp, atyn álemge tanytqan shyǵarma – «Adamnyń jaratylýy» kartınasy. Bul týyndy 1508 jyldyń kókek aıynda Papa Iýlııdiń tapsyrmasymen shirkeý tóbesine salynǵan freska edi. Munda sýretshi dúnıeniń jaratylýy haqyndaǵy Injildiń ilki ańyzyn beıneleıdi. Onda Jaratýshy adamdy óz beınesine uqsatyp jaratqanyn aıtady. Mıkelandjelo dál osyǵan basym baǵyt beredi.
Kartınanyń eń dramalyq shıelenisin qudaı men adamnyń sozǵan qoldary jasap tur. Bul eki bolmys arasyndaǵy rýhanı baılanysty bildiredi deıdi ónertanýshylar. Iá, Táńir adamǵa óz rýhyn úrledi. Boıyna qudiret darytty. О́zine uqsaýyna múmkindik berdi. Dál osy sáýleli sátti beıneleý Mıkelandjelonyń qylqalamyna buıyrǵan edi. Keıin bul kartına onyń tólqujatyna aınalyp ketti.
Mıkelandjelo 1564 jyly 18 aqpanda bezgek aýrýynan qaıtys bolady. Aqtyq demi shyǵar aldynda súleı sýretker: «Men óz mamandyǵymnyń tek álipbıin ǵana úırene bastaǵanymda ómirden ótip bara jatqanyma qatty ókinemin», dep kúrsinipti.
